विराटनगर, माघ २
विभिन्न लायन्स क्लबहरुको सहभागितामा विराटनगरस्थित कोशी अंचल अस्पताल परिसरमा सुविधा सम्पन्न शवगृह निर्माण गरिएको छ । लायन्स क्लब अफ विराटनगर एक्टीभ,लायन्स क्लब अफ विराटनगर शुभम र लायन्स क्लब अफ दिङला भोजपुरको सामूहिक सहभागितामा शवगृह निर्माण गरिएको हो ।
६ लाख ३ हजार ३ सय १५ रुपैयाँको लागतमा सो ठांउमा २ सय ३४ स्क्वायर फिटको सुविधा सम्पन्न शवगृह निर्माण गरिएको हो । विभिन्न कारणले मृत्यु भएकाहरुलाई पोष्टमार्टम गर्न सुविधा सम्पन्न स्थानको अभाव देखेर शव गृह निर्माण गरिएको लायन्स क्लब अफ विराटनगर एक्टीभका संस्थापक अध्यक्ष रेबतबहादुर कार्कीले बताए । निर्माण गरिएको एयरकन्डिशनसहितको शवगृहमा तीनवटा बेड छन् ।
यसैबीच लायन्स क्लब अफ विराटनगर सिटिजन्सले कोशी अंचल अस्पतालमा उपचाररत दुइ विरामीलाई आर्थिक सहयोग उपलब्ध गराएको छ । सिटिजन्सले कोशी अंचल अस्पतालमा उपचाररत खांदबारी नगरपालिका ७ का ६० बर्षिय लिलाबहादुर घिमिरे र बेलबारी नगरपालिका ६ की २६ बर्षिय कविता खवास राईलाई उपचार रकम उपलब्ध गराएको हो ।
घिमिरे र राईलाई विपन्नताका कारण उपचारमा समस्या भएपछि आर्थिक सहयोग उपलब्ध गराइएको हो । घिमिरेलाई ५४ हजार बढीको सहयोग रकम उपलब्ध गराइएको छ भने राईलाई गर्भमै बच्चा मृत भएका कारण शल्क्रिया गर्नुपर्ने भएपछि सहयोगस्वरुप ५ हजार १ सय नगद प्रदान गरिएको छ ।
