विराटनगर, माघ ७
विराटनगर १ मा रहेको परोपकार घाटको ब्यवस्थापनका लागि अक्षयकोष स्थापना गर्ने उद्धेश्यले विराटनगरमा आयोजित श्रीमद्भागवत महायज्ञमा १ करोड बढी रकम संकलन भएको छ । विराटनगर ३ स्थित परोपकार अभियान समूहले गएको २ गतेदेखि आयोजना गरेको महापुरणमा पूराण सकिनु दुईदिन अघिनै लक्ष्य भन्दाबढी सहयोग रकम सकलन भएको हो ।
पूराण आयोजक समितिका अध्यक्ष बाबुराम न्यौपानेले १ करोड संकलन गर्ने लक्ष्यसहित आयोजना गरिएको महायज्ञ समापनको दुईदिन अघि नै लक्ष्य पुरा भएको जानकारी दिए । संकलित रकमबाट पोखरीयास्थित सिंघीया किनारमा परोपकार घाट ब्यवस्थापनका निम्ति अक्षयकोष स्थापना गरिने उनले बताए ।
पण्डित योगेश भण्डारी बराहक्षेत्रले कथा वाचन गरिरहेको महापुराणमा विराटनगरका ८४ बर्षिय जेष्ठ नागरिक पण्डित भीमप्रसाद अधिकारी दम्पतिले सोमबार तुला दान गरेका छन् । सो क्रममा उनीहरुले आफ्नो तौल अनुसारको द्रब्य र बहुमुल्य धातु दान गरेका छन् ।
