विराटनगर, माघ १७
विराटनगरकी ११ बर्षिया बालिका रुपमती दासको रहस्यमय मृत्यु पछि परिवारको आर्थिक विपन्नताका कारण आर्थिक अभावले मृतक बालिका रुपमतिको शव खाल्डो खनेर पुरिएको तथा काजक्रिया गर्न समेत समस्या भएको समाचार बाहिरिएपछि मनकारी सहयोगीहरुले पीडित परिवारलाई सहयोगको हात अघि बढाएका छन ।
परिवारमाथि आइपरेको विपत्तिका कारण दैनिक ज्याला मजदुरीमा जान नसकेपछि मृतकका मातापिता तथा भाइबहिनीलाई दुई छाक खान समेत समस्या भएको बिषय बाहिर आएपछि उनको परिवारलाई सहयोगगर्ने सहयोगिहरु अघि आउन थालेका हुन् ।
बिहीबार दिउसो संघीय समाजबादी फोरम नेपालको नगर समितिका कार्यवाहक अध्यक्ष मोहम्मद नसरुलले मृतक परिवारलाई खाद्यान्न सहयोग गरेका छन् । उनले पीडित परिवारको घर पुगेर चामल २५ केजी सहित दाल,तेल,भुजा र पाउरोटी उपलब्ध गराएका हुन ।
घटना भएयता मृतकका ठेला चालक बाबु रामप्रसाद र आमा मन्नीदेवी ज्याला मजदुरी गर्न जान नसकेका कारण ६ जनाको परिवारलाई खान लाउन र बालिकाको काजक्रिया गर्न समस्या भएको छ ।
