झापा, माघ १८
दक्षिणी झापाबासीको बहुप्रतिक्षित भद्रपुरस्थित मेची नदीमा नवनिर्मित मेची पुलको बिहीबार एक भव्य समारोहका बीच प्रधानमन्त्री केपी शर्मा ओलीले उद्घाटन गरेका छन् । नेपाल–भारतको सीमामा पर्ने मेची पुलको रिवन काटेर शिलालेख अनावरण गरेर प्रधानमन्त्री ओलीले उद्घाटन गरेका हुन् । भद्रपुरबासीको लामो सपना पुरा भएकोमा हर्षित मुर्दामा देखिएका प्रधानमन्त्री ओलीले नवनिर्मित पुल माथि पैदल हिँडेका थिए । यता पुल उद्घाटनलाई सम्बोधन गर्दै प्रधानमन्त्री ओलीले मेची पुलको उद्घाटनसँगै यस क्षेत्रको विकासले फड्को मारेका बताएका छन् ।
‘पूर्वको मेची पुलदेखि नै हुलाकी राजमार्ग जोडिन्छ, मेची राजमार्गको चाराआली केचन सडक खण्ड पनि जोडिदैछ, त्यसैले यस क्षेत्रको विकास अब कसैले चाहेर राक्न सक्दैन, उनले थपे । ‘मेची पुलको दुवै तर्फको सडक जोडिएको छैन भन्ने सुनेको छु, प्रधानमन्त्री ओलीले भने, भारतकोतर्फ सडक निर्माणका लागि भारतीय प्रधानमन्त्रीसंग कुरा गरेर काम अघि बढाउँछौ । प्रधानमन्त्री ओलीले युवा समयको स्मरण गराउँदै भने, “यही मेची नदीमा पानी र बालुवा तैरिएर हाफ् प्यान्ट युवामा रेल हेर्न गलगलिया गएका थियो ।
कार्यक्रममा भौतिक पूर्वाधार तथा यातायात व्यवस्था मन्त्री रघुबीर महासेठले मेची पुलसँगै जोडिएको हुलाकी राजमार्गको काम झापामा आगामी बर्ष भित्र पूरा गर्ने बताए । साथै जिल्लाको अन्य सडकको काम पनि तिव्र गतिमा अघि बढाउन सरकार लागि परेको उनको भनाई छ । कार्यक्रममा प्रदेश सांसद ओमप्रकाश सरावगी, भद्रपुर नगरपालिका नगर प्रमुख जीवनकुमार श्रेष्ठ लगायतले बोलेका थिए ।
तत्कालीन उपप्रधान एवंम भौतिक योजना तथा निर्माण मन्त्री विजयकुमार गच्छदारले २०६६ माघ २१ गते मेची पुलको शिलान्यास गर्दै तीन बर्ष भित्र पुल निर्माण हुने दावी गरेका थिए । तर, गच्छदारले बोलेको कुरा तीन बर्षमा नभएर ९ बर्ष पूरा भएको छ । भारतको बंगाल तथा बिहार राज्यसंग जोडिने पुलको कुल लागत करिब ३३ करोड रहेको छ ।
१७ वटा पिलर रहेको मेची पुलको लम्बाई ५ सय ६० मिटर र चौढाई ९.८ मिटर रहेको हुलाकी राजमार्ग आयोजनाका निर्देशक अर्जुन थापाले जानकारी दिए । अनक एण्ड सुर्य जेभीले ३७ करोड ३६ लाख ८५ हजार ५६२ रुपैयामा ठेक्का सम्झौता गरेको थियो । निर्माण कार्य सम्पन्न भइसक्दामा ३५ करोड ९८ लाख खर्च भएको निर्दैशक थापाले बताए ।
