विराटनगर, माघ २१
प्रमुख प्रतिपक्षी दल नेपाली कांग्रेसले विराटनगरमा पनि सरकारविरुद्ध प्रदर्शन गरेको छ । कम्युनिस्ट प्रधानमन्त्री केपी शर्मा ओली नेतृत्वको सरकारले अधिनायकवाद लाद्न थालेको भन्दै कांग्रेसले देशभर सोमबार सडक आन्दोलन गरेको हो ।
भ्रष्टाचार, महगी , बलत्कार बढेको भन्दै कांग्रेसले विराटनगरमा प्रदर्शन गरेको हो । यस्तै देशमा सुशासन कायम गर्न नसकेको, सुरक्षा दिन नसकेको पनि कांग्रेसले आरोप लगाएको छ । चिकित्सा शिक्षा विधेयकमा आफ्ना सरोकारहरु नसमेटिएको भन्दै कांग्रेस रुष्ट बनेको हो ।
विरोध कार्यक्रमलाई सम्बोधन गर्दै नेपाली कांग्रेसका केन्द्रीय सदस्य अमृत अर्यालले दुई तिहाइको सरकारले जनअपेक्षा अनुसार काम गर्ला भनी कांग्रेसले आशा गरेको बताउदै त्यसको उल्टो जनताको चाहना विपरीत ओली सरकार लागेको आरोप लगाए ।
सरकार विरोधी कांग्रेसको प्रर्दशनमा विराटनगर महानगरपालिकाका मेयर भीम पराजुलीपनि सहभागि थिए । कार्यक्रममा नेपाली कांग्रेसका नेताहरु हसन अन्सारी, शिवसिंह गन्गाई, सुर्यमाराज राई, रामनारायण मण्डल, शोभा पालुहाङ लगायतका वक्ताहरुले विधिको शासनको पूर्ण पालना र राज्य संचालन पारदर्शी हुनुपर्ने लगायतका माग गरेका थिए ।
