काठमाडौँ, फागुन २
प्रधानमन्त्री केपी शर्मा ओलीले बिहीबार नेपाल पानीजहाज कार्यालयको उद्घाटन गरेका छन । प्रधानमन्त्री ओलीले ललितपुरको एकान्तकुनामा एक कार्यक्रमका बीच नेपाल पानी जहाज कार्यालयको उद्घाटन गरेका हुन ।
त्यस अवसरमा उनले मुलुक पानीजहाजको नयाँ युगमा प्रवेश गरेको उद्घोष गरे । प्रधानमन्त्री ओलीले केही महिना भित्रै मुलुकमा पानीजहाज संचालन हुनेगरी आवश्यक स्थान, जनशक्ति र योजनासहित मुलुक अघि बढेको पनि स्पष्ट पार्नु भयो । उनले पानीजहाज आउँदैन कि भन्नेहरुलाई केही महिना पर्खेपछि पानीजहाज संचालनमा आउने र टिकट पाईने पनि बताए । प्रधानमन्त्री ओलीले आफूले पहिलो पटक प्रधानमन्त्री भएको बेला भारतसँग छलफल गरेको नेपालमा पानीजहाज चलाउने योजनाले अव साकार रुप लिन लागेको पनि स्पष्ट पारे । उनले नेपालमा रेलमार्ग भन्दाअघि जलमार्ग संचालनमा आउने विश्वास पनि व्यक्त गरे ।
प्रधानमन्त्री ओलीले पानीजहाज कार्यालय केहीलाई जागिर खुवाउन नभई देशलाई एक कदम अघि बढाउनका लागि संचालनमा ल्याइएको पनि उल्लेख गरे । कार्यक्रममा बोल्दै भौतिक पूर्वाधार तथा यातायात मन्त्री रघुवीर महासेठले प्रधानमन्त्रीको प्रत्यक्ष निर्देशनमा सो कार्यालय स्थापना गरिएको र अव छिट्टै राष्ट्रिय झण्डा बाहक पानीजहाज कुदाउने दावी पनि गरे । नेपालमा पहिलो पटक २०२७ सालमा पानीजहाज कार्यालय संचालनमा आएपनि अघि बढन सकेको थिएन ।
प्रधानमन्त्री ओलीले भने कार्ययोजनासहित पानीजहाज कार्यालय स्थापना गरेका छन । भौतिक पूर्वाधार तथा यातायात मन्त्रालय अन्तरगत रहने गरी स्थापना गरिएको सो कार्यालयको प्रमुख रजिष्ट्रार रहने व्यवस्था गरिएको छ । सो कार्यालयमा रजिष्ट्रार, उपसचिवसहित १६ जना कर्मचारीको व्यवस्था गरिएको पनि भौतिक पूर्वाधार तथा यातायात मन्त्रालयले जनाएको छ ।
कार्यालयलाई पानी जहाजको दर्ता र पानी जहाज मार्गको व्यवस्थापन सम्बन्धि सम्पूर्ण काम गर्ने जिम्मेवारी दिइएको पनि भौतिक पूर्वाधार तथा यातायात मन्त्रालयका सचिव मधुसुदन अधिकारीले जानकारी दिए । मन्त्रीपरिषद बैठकले पानीजहाज खरिदका लागि आवश्यक व्यवस्था गर्न पनि भौतिक पूर्वाधार तथा यातायात मन्त्रालयलाई स्विकृति दिईसकेको छ ।
