काठमाडौँ, फागुन २७
इथियोपिया विमान दुर्घटनामा एक नेपालीको मृत्यु भएको छ । दुर्घटनामा गोर्खाकी एकता अधिकारीको मृत्यु भएको पुष्टि भएको हो । अधिकारी संयुक्त राष्ट्रसंघको विश्व खाद्य कार्यक्रम (डब्ल्यूएफपी)मा कार्यरत थिइन् । नेपालस्थित डब्ल्यूएफपी कार्यालयले ट्वीटरमार्फत अधिकारीको निधन भएको पुष्टि गरेको छ ।
डब्ल्यूएफपी नेपालले शोक व्यक्त गर्दै ट्वीटरमा लेखेको छ, ‘एक प्रतिभाशाली मानवतावादी जसले धेरै जनाको जीवनमा खुसी ल्याएकी थिइन् ।’ यूकेबाट एमबीए अध्ययन गरेकी एकता गत डिसेम्बर महिनादेखि इथियोपियास्थित डब्ल्यूएफपीमा सप्लाई चेन अफिसरका रूपमा कार्यरत थिइन् । त्यसअघि गत वर्ष सेप्टेम्बर महिनासम्म उनी नेपालमै कार्यरत थिइन् ।
गत वर्ष पपुआ न्यूगिनीमा भूकम्प गएपछि उनलाई त्यहाँ पठाइयो । पपुआ न्यूगिनीना दुई महिनासम्म काम गरेपछि गत सेप्टेम्बरदेखि उनी इथियोपियामा थिइन् । इथियोपियाको राजधानी आदिस अबाबाबाट नैरोबीका लागि उडेको विमान दुर्घटनामा चालक दलका आठ सदस्यसहित १४९ यात्रुको मृत्यु भएको छ । यो दुर्घटनामा संयुक्त राष्ट्रसंघका मात्रै १९ सदस्यको मृत्यु भएको छ ।
तिमध्ये डब्ल्यूएफपीका सात जना कर्मचारी थिए । उनीहरु अधिकांश नैरोबीमा आयोजित एक कार्यक्रममा जाँदै थिए । गोरखाको छोप्राक स्थायी घर भएकी अधिकारीका बुबाआमा अमेरिकामा छन् । दाजु भाइ काठमाडौंमा छन् । उनले विद्यालय शिक्षा पनि काठमाडौंमै लिएकी हुन् ।
