काठमाडौँ, बैशाख १०
अभिनेता बिराज भट्टले निर्माण गर्न लागेको चलचित्र ‘साङ्लो’ को विषयलाई लिएर विराज भट्ट र सोही चलचित्रका प्रोडक्सन म्यानेजर शङ्कर पाण्डेबिच हात हालाहाल भएको छ ।‘साङ्लो’को विषयलाई लिएर उनीहरुबीच सोमबार हात हालाहाल भएको हो ।
सोमबार साँझ बानेश्वरको एम क्याफेमा यी दुईको झगडा भएको हो । बिराज भट्टको निर्माण , निर्देशन र अभिनय रहने चलचित्रको छायाङ्कन पुषबाट हुने भनिएको थियो । सोही अनुरूप पाण्डेलाई प्रोडक्सन डिजाइनको रूपमा सम्झौता गराएका थिए । तर चलचित्रको छायाङ्कन ढिलो सुरु भएपछि शंकरले साङ्लोमा काम गर्न नसक्ने जानकारी दिए ।
बुझिएअनुसार सोमबार बिराजले चलचित्रको छलफलको लागी शंकरलाई उक्त काफेमा बोलाएका थिए । भट्टले पाण्डेलाई चलचित्र छाड्ने भए सम्भौताअघि दिइएको पैसा फिर्ता गर्न आग्रह गरेका थिए । तर पाण्डेले करिब ४ महिनाबढि आफुले चलचित्रको लागी समय बिताएको कारण पैसा फिर्ता नगर्ने अडान लिएपछि माहौल गर्मिएको थियो ।
त्यसपछि भट्टले पाण्डेलाई मुड्कीले बजारेका थिए भने पाण्डेले भट्ट माथी कुर्सी बजारेको बताइएको छ ।यद्यपी विवाद सुल्झ्याउन मंगलवार दिउँसो चलचित्र प्राविधिक संघले बोलाएको बैठकमा अभिनेता भट्टले प्राविधिक पाण्डेसँग माफी मागेका छन् ।यही वैशाखबाट छायाङ्कन सुरु हुने ‘साङ्लो’मा पुर्व मिस नेपाल निकिता चण्डकको मुख्य भूमिका रहेको छ ।
