बुटवल, वैशाख ११
गौतम बुद्धको जन्मस्थल रुपन्देहीको लुम्बिनीमा २० लाख पर्यटक भित्र्याउने लक्ष लिएर प्रदेश नम्बर ५ सरकारले औपचारिक रुपमा लुम्बिनी भ्रमण बर्ष २०७६ घोषणा गरेको छ ।
लुम्बिनीलाई मुल भागमा राखी गौतम बुद्धसँग सम्बन्धित अन्य स्थानहरुको समेत प्रसारप्रसार र प्रर्वद्धन गर्ने गरी भ्रमण बर्षको सुरुवात गरिएको हो ।
लुम्बिनी भ्रमण बर्ष प्रसारप्रसार मुल समितिको आयोजनामा बुटवलमा आयोजना गरिएको पत्रकार सम्मेलनमा उद्योग, पर्यटन वन तथा वातावरण मन्त्री लिला गिरीले विश्वकै गौरवको रुपमा रहेको लुम्बिनीलाई थप प्रसारप्रसार गरी बढी पर्यटक भित्र्याउन लुम्बिनी भ्रमण बर्ष फलदायी हुने बताए ।
पवित्र चार बौद्ध गन्तब्यमध्ये सवैभन्दा महत्वपूर्ण गन्तब्य हुनुका कारण विश्वभरिका डेढ अर्व वौद्धमार्गीहरूका लागि लुम्बिनी आकर्षक तीर्थस्थल भएको भन्दै मन्त्री गिरीले ऐतिहासिक, पुरातात्विक र साँस्कृतिक हिसावले पनि यो स्थान पर्यटकहरूका लागि उत्तिकै महत्वपूर्ण रहेको समेत बताए ।
जीवनमा एक पटक बुद्धको पावन जन्मभूमिमा पुग्ने आकांक्षा बोकेका दुनियाँभरिका डेढ अर्व बुद्धमार्गीहरूलाई लुम्बिनी र नेपालको भ्रमणमा आकर्षित गर्न सकिन्छ भन्ने निष्कर्षका साथ प्रदेश सरकारले लुम्बिनी भ्रमण वर्ष २०७६ मनाउन लागि परेको उनको भनाई थियो ।
लुम्बिनी भ्रमण वर्षको सफल कार्यान्वयनबाट यस प्रदेशको मात्र नभई देशकै पर्यटन उद्योगमा बिल्कुलै नयाँ अवसर र अवस्था सिर्जना हुने विश्वास प्रदेश सरकारको रहेको छ ।
त्यसबाहेक बुद्धको मावली देवदह, कोलीय सभ्यताको केन्द्र रामग्राम, सैनामैनालगायतका बुद्ध परिपथसँग सम्बन्धित दर्जनौं ऐतिहासिक पुरातात्विक स्थलहरू पर्यटकीय दृष्टिले आकर्षणका केन्द्रको रुपमा प्रदेश सरकराले पहिचानसमेत गरेको छ ।
लुम्विनीलाई ग्रेटर लुम्विनीको रुपमा विकास गर्दा कपिलवस्तु र नवलपरासी समेतलाई वौद्धमार्गीहरूको आकर्षक गन्तब्य स्थल बनाउन सकिन्छ भन्ने प्रदेश सरकारको धारणा रहेको मन्त्री गिरीको भनाई छ । लुम्बिनी भ्रमण बर्ष २०७६ का लागि ‘बुद्ध जन्मस्थल लुम्बिनी जाऔं ः शान्तिको सन्देश फैलाऔं’ भन्ने मुल नारासमेत तय गरिएको छ ।
