विराटनगर, बैशाख २२
मातातीर्थ औशीको अवसर पारेर विराट मल्टिपल कलेजले पुष्पलाल चौक स्थित “महिला जागृती तथा वृद्धाश्रम“का वृद्धाआमाहरूका लागि निशुल्क स्वास्थ्य शिविर आयोजना गरेको छ ।
अशक्त र असहायका लागि योगदान ,समाज परिवर्तनका लागि सुक्ष्मजिव विज्ञान भन्ने मूल नाराका साथ कलेजको नेपाल सुक्ष्मजिवी विद्यार्थी संघले शिविरको आयोजना गरेको हो ।
शिविरमा विराटनगर स्थित न्युरो अस्पतालको प्राविधिक सहयोगमा चिकित्सक डा. पार्थ गुरागाईंले आमाहरुको स्वास्थ्य जाँच गरेका थिए । निशुल्क शिविरमा आमाहरुलाई आवश्यक औषधि समेत वितरण गरिएको थियो ।
कार्यक्रममा संस्थाका पुर्व अध्यक्ष एकराज श्रेष्ठ , समाजसेवी विवेक श्रेष्ठ , युवा अभियन्ता अभिषेक भट्टराई लगायतको सहभागिता रहेको थियो । कार्यक्रममा चिकित्सक डा. गुरागाईं र नर्सहरुलाई सम्मान समेत गरिएको थियो ।
