एजेन्सी, बैशाख २९
आज भारतमा जारी १२ औं संस्करणको इण्डियन प्रिमियर लिग (आईपीएल) क्रिकेटको उपाधि भिडन्त हुँदैछ । आईपीएलको उपाधिका लागी साविकको विजेता चेन्नई सुपर किङ्स र मुम्बई इन्डियन्स भिड्दै छन् ।
हैदरावादस्थित राजिब गान्धी क्रिकेट स्टेडियममा केहीबेरमा सुरु हुने फाइनल खेलमा मुम्बईले टस जितेर ब्याटिङ गर्ने भएको छ । खेल नेपाली समय अनुसार बेलुका ७ः४५ मा सुरु हुनेछ । महेन्द्र सिंह धोनीको कप्तानीमा रहेको चेन्नई र रोहित शर्माको कप्तानीमा रहेको मुम्बईबीचको उपाधि भिडन्त निकै रोमान्चक हुने अनुमान गरिएको छ र,प्रतिस्पर्धाका लागि मैदान उत्रदा दुवै टोलीको लक्ष्य उपाधि जित्नु हुनेछ ।
चेन्नई मुम्बईलाई पराजित गर्दै उपाधि रक्षाको लक्ष्यमा हुनेछ । तर,यस सिजन मुम्बईविरुद्ध चेन्नईले जित निकाल्न सकेको छैन । अघिल्लो तीन भेटमा मुम्बईले चेन्नईलाई हराएको थियो । चेन्नई फाइनलमा मुम्बईसंग बदला लिने योजनासहित मैदान उत्रनेछ । यता, मुम्बई अघिल्ला तीन खेलको नतिजाले आत्मविश्वासका साथ मैदान उत्रनेछ ।
मुम्बई चेन्नईमाथि लगातार चौथो जित निकाल्दै उपाधि जित्न चाहन्छ । मुम्बईले पहिलो क्वालिफायरमा चेन्नईलाई ६ विकेटले हराएर फाइनल यात्रा तय गरेको थियो । यता, चेन्नईले दोस्रो क्वालिफायरमा दिल्ली क्यापिटल्सलाई ४ विकेटले नै हराएर मुम्बईसंगको भेट पक्का गरेको थियो । हालसम्म दुवै टोलीले समान ३ पटक आईपीएलको उपाधि जितेका छन् ।
