बस र ट्रक ठोक्किँदा सिरहामा चालकसहित २ जनाको मृत्यु भएको छ । गएराति पूर्व–पश्चिम लोकमार्गअन्तर्गत सिरहाको कर्जन्हा नगरपालिका – १० स्थित प्रयागपुर चोकमा बस र ट्रक एकआपसमा ठोक्किँदा दुई जनाको मृत्यु भएको छ भने २५ जना घाइते भएका छन् ।
मृत्यु हुनेमा बस चालक भोजपुर निवासी ३५ बर्षीय हरि पहेली र झापा निबासी ४० बर्षीय मदन उप्रेती रहेको प्रहरीले जनाएको छ । ना ८ ख ९८२ नम्बरको प्राइम बस पूर्व झापाबाट काठमाण्डौं जादैँ गर्दा पश्चिमबाट आइरहेको ना ३ ख ४२६४ नम्बरको ट्रकसँग ठोक्किएर दुर्घटना भएको इलाका प्रहरी कार्यालय मिर्चैयाका डीएसपी सुकदेव खनालले जानकारी दिए । डीएसपी खनालकाअनुसार दुर्घटनामा दुई जनाको मृत्यु भएको छ भने २५ जना घाइते भएका छन्। घाइतेमध्ये १० जना गम्भीर रहेका छन् ।
एकजनाको घटनास्थलमै र अर्कोको उपचारको क्रममा मिर्चैयामा मृत्यु भएको डीएसपी खनालले बताए । सामान्य घाइतेहरुको स्थानीय अस्पतालमा र गम्भीर घाइतेलाई विराटनगर ल्याइएको प्रहरीले जनाएको छ।
