दाहाल प्रतिष्ठान विराटनगरले न्यू सृष्टि दैनिकका प्रकाशक,प्रधानसम्पादक शंकर खरेललाई स्व. विद्यादेवी बाबुराम सरस्वती दाहाल सेवा पत्रकारिता पुरस्कार प्रदान गरेको छ ।
प्रतिष्ठानले शनिबार विराटनगरमा एकसाथ आयोजना गरेको महत्वपूर्ण तीन कार्यक्रममा वरिष्ठ पत्रकार खरेललाई १५ हजार राशिको पत्रकारिता पुरस्कारबाट पुरस्कृत एवं सम्मानित गरेको हो । खरेलले प्राप्त पुरस्कार राशिमा थप गरेर विराटनगर–१ र १९ का ४३ विद्यार्थीलाई पोशाक प्रदान गर्ने बताए । प्रतिष्ठानले आयोजना गरेको सम्मान, हवनकुण्ड तथा जमराघर शिलान्यास एवं वंशावली विमोचन कार्यक्रममा दाहाल सेवा प्रतिष्ठानका संस्थापक अध्यक्ष शालिग्राम दाहाल लगायतले खरेललाई सम्मानसहित पुरस्कृत गरे । प्रतिष्ठानले गोविन्द पोखरेल, गीता घिमिरे, चेतनाथ पोखरेल, बुद्धिबहादुर मगर, खगेन्द्र दासी र मनोज भट्टराईलाई स्व. विद्यादेवी बाबुराम सरस्वती दाहाल सम्मान प्रदान गरेको छ । प्रतिष्ठानले विभिन्न सामुदायिक स्कुलमा अध्ययनरत ९ विद्यार्थीलाई नगदसहित पुरस्कृत गरेको छ । डा. तीर्थराज कोइराला र डा. मीना कोइराला कोषबाट अनिता दाहाललाई ११ हजार र राजकुमार साहीलाई ७ हजार नगद सहित पुरस्कृत गरेको छ ।
