१५ जेष्ठ, २०७६
सरकारले वृद्ध भत्ता एक हजार बढाएको छ ।
अर्थमन्त्री डा. युवराज खतिवडाले आगामी आर्थिक वर्षको बजेट बुधबार संघीय संसदको बैठकमा पेश गर्दै वृद्धहरुलाई प्रतिमहिना दिईदै आएको २ हजार वृद्धभत्ता बढाएर ३ हजार पुर्याइएको जानकारी दिएका छन् ।
जेष्ठ नागरिकलाई सम्मान र संरक्षण राज्यले गर्नुपर्छ भन्ने मान्यताको आधारमा वृद्ध भत्ता थप गरिएको पनि अर्थमन्त्री खतिवडाले स्पष्ट पारेका छन् । यसबाट करिव १३ लाख वृद्धहरु प्रत्यक्ष लाभान्वित हुने सरकारले जनाएको छ । त्यसैगरी बजेटमा शारिरीक रुपमा अशक्त एकल महिला, आदिवासी, जनजाति समेतलाई दिँईदै आएको सामाजिक सुरक्षा भत्ता पनि एक हजार बढाइएको छ ।
अर्थमन्त्री खतिवडाले उनीहरुको जीवन यापनमा थप सहजता ल्याउन सो भत्ता पनि थप गरिएको बताए ।
बजेटमा वृद्धहरुको सम्मान र संरक्षणका लागि सबै स्थानीय तहमा ‘जेष्ठ नागरिक सेवा तथा मिलन केन्द्र’ स्थापना गर्ने व्यवस्था पनि मिलाइएको छ । अर्थमन्त्री खतिवडाले जेष्ठ नागरिकहरुलाई एक लाखको स्वास्थ्य विमा गर्ने कार्यक्रमलाई पनि निरन्तरता दिइएको जानकारी दिए ।
