३२ जेठ, विराटनगर। विराटनगरका पत्रकार शंकर खरेलले पुरस्कार बापतको रकमबाट विपन्न विद्यार्थीहरुलाई पोशाक वितरण गरेका छन् ।
विराटनगरबाट प्रकाशित हुने न्यू सृष्टी दैनिकका प्रधान सम्पादक तथा प्रकाशक खरेललाई कदर गर्दै केही दिन अघि मोरङ व्यापार संघ, उद्योग संगठन मोरङ , दाहाल प्रतिष्ठान लगायतले नगद सहित पुरस्कृत गरेका थिए । उनले त्यही पुरस्कारबाट प्राप्त ६० हजार रुपैया व्यक्तिगत रुपमा खर्च नगरी विराटनगर स्थित परोपकार आधारभूत विद्यालयका ४० र सार्वजनिक माध्यमिक विद्यालयका ३ गरी जम्मा ४३ जना छात्रछात्रालाई विद्यालय पोशाक वितरण गरेका हुन् ।
कार्यक्रममा विराटनगर महानगरपालिकाका मेयर भीम पराजुलीले नगरक्षेत्रका सामुदायिक विद्यालय सुधारकालागि ऐन बनाई कार्य गर्ने वताए । उनले आगामी वर्ष नगर क्षेत्रका १० वटा सामुदायिक विद्यालयलाई नमूना वनाउने र यसका लागि रु ५० लाख वजेट छुट्याउने बताए । सम्पादक खरेलले आफुले प्राप्त गर्ने पुरस्कारको राशी आगामी दिनमा पनि यसरी नै शिक्षा तथा सामाजिक क्षेत्रमा खर्च गर्ने बताए ।
पोशाक वितरण समारोहमा त्रिवेणी वचतका अध्यक्ष गणेशप्रसाद उप्रेती,मोरङ व्यापार संघका नव निर्वाचित अध्यक्ष प्रकाश मुन्दडा,उद्योग संगठन मोरङका अध्यक्ष भीम घिमिरे र वडा नम्बर १ का वडाध्यक्ष उद्धव आर्यालले परोपकार विद्यालयमा पुस्तकालय, दिवा खाजा आदिका लागि सहयोग गर्ने प्रतिवद्धता व्यक्त गरे ।
