३ असार, विराटनगर । लोक सेवा आयोगले जेठ १५ मा निकालेको विज्ञापन समावेशी सिद्धान्त विपरीत रहेको भन्दै विराटनगरमा प्रदर्शन भएको छ ।
समाजवादी विद्यार्थी फोरम नेपाल र नयाँशक्ति विद्यार्थी युनियन जिल्ला समिति मोरंगले मंगलबार विराटनगरस्थित जिल्ला प्रशासन कार्यालय अगाडी धर्ना प्रदर्शनगर्दै संयुक्तरुपमा सो बिषयको ज्ञापन प्रधानमन्त्रीलाई पठाएका छन् । प्रदर्शनमा सहभागि विद्यार्थीहरुले ‘लोकसेवाको असमानुपातिक विज्ञापन खारेज गर’,‘शैक्षिक बेरोजगार युवालाई रोजगारीको ग्यारेन्टी गर’,‘समानुपातिक समावेशी सिद्धान्तको आधारमा लोकसेवाको विज्ञापन तुरुन्त जारी गर’ लगायतका नारा लेखिएका प्लेकार्ड बोकेका थिए । विभिन्न चरणमा भएका आन्दोलनहरुको उपलब्धि स्वरुप प्राप्त समावेशीको अधिकारलाई कुण्ठित गर्ने प्रयासस्वरुप आयोगको विज्ञापन निकालिएका कारण आफुहरु धर्ना प्रदर्शन गर्न बाध्य भएको विद्यार्थी नेता महेशकुमार यादवले बताए । उनीहरुले प्रमुख जिल्ला अधिकारी रमेशकुमार केसीलाई ज्ञापन हस्तान्तरण गरे ।
प्रधानमन्त्रीलाई पठाइएको ज्ञापनमा संबिधानको मुल मर्म र भावना विपरित निकालिएको विज्ञापन तत्काल खारेज गरी समावेशी सिद्धान्तका आधारमा पुनः अर्को विज्ञापन निकाल्न माग गरिएको छ ।
