१३ असार, विराटनगर । अध्ययन गर्न विद्यालय गएका एक बालक आँखामा गम्भीर चोट लिएर फर्किएका छन् । शिशु कक्षामा अध्यनरत धनपाल थान गांउपालिका २ का ४ बर्षिय बालक इसान साह आँखामा गम्भीर चोट लागेर घाइते भएका हुन् ।
असार ६ गते आफु अध्ययनरत स्थानिय आनन्द प्राथमिक विद्यालय गएका उनी आँखामा चोट लिएर फर्किएका हुन् । दाहिने आँखाको नानी छेउमा गम्भीर प्रकृतिको चोट लागेका कारण उनको आँखाको डिम्मामा रगत जमेर राताम्मे भएको छ । उनको विराटनगरस्थित रामलाल गोल्छा आँखा अस्पतालमा उपचार भइरहेको छ । असार ६ गते अध्ययनगर्न विद्यालय पुगेका बालकलाई विद्यालय पुगेको एकघन्टा भित्रै चोट लागेपछि सोहि विद्यालयमा कक्षा ५ मा अध्ययनगर्ने दिदि मुस्कान साहले लिएर घर फर्केकी थिइन । लगत्तै घटनाको बिषयमा बुझ्न जाँदा विद्यालयमा रहेकी शिक्षिका डल्ली चौधरीले बालकलाई लागेको चोटको बिषयमा आफुलाई जानकारी नभएको बताएको घाइते बालकका बाबु गौतम साहले जानकारी दिए । कक्षा चलिरहेको समयमा आफ्नो छोरोलाई कुटपिटबाट अथवा अन्य के कस्तो कारणले चोट लागेको बिषयमा विद्यालयले जानकारी दिन नचाहेको उनको भनाई छ । घटनाको बिषयमा सम्बन्धित निकायहरुलाई ध्यानाकर्षण गराउंदा समेत कसैले चासो नलिएको साहको भनाई छ । घटनाको छानबिन गर्न जिल्ला शिक्षा समन्वय समिति मोरङ सहित धनपाल गांउपालिकाका सम्बन्धितलाई जानकारी गराउदा समेत घटनाको यथार्थ जानकारी पाउन नसकिएको उनले गुनासो गरे । विद्यालयका प्रधानाध्यापक सम्पतलाल मण्डलले भने घटनाको दिन घाइते बालक र कक्षा ५ मा अध्यनरत उनकी दिदि मुस्कान साह कक्षा–५ कै कोठामा बसेको तथा सोहि क्रममा ब्रेन्चबाट लडेर घाइते भएको दाबी गरेका छन् ।
