विराटनगर : किनमेलका लागि भारतीय बजार जोगवनी हिँडेकी एक महिलाले सडकमा नै बच्चा जन्माएकी छिन् । सोमबार बिहान करिब ६ बजे विराटनगर बसपार्कमा इटहरीकी सालु सरदारले छोरा जन्माएकी हुन् ।
सामान्यतया सुत्केरी व्यथाले च्यापेपछि महिलालाई प्रसुती गराउन अस्पताल पुर्याइन्छ । तर गर्भ रहेपछि स्वास्थ्य परीक्षण नगराएकी इटहरी– ७ गैसारकी ३५ वर्षीया सालु सरदारले सुत्केरी हुँदा आवश्यक पर्ने सामाग्री खरिद गर्न जोगवनी जाँदै गर्दा सडकमा नै छोरो जन्माएकी हुन् ।
एक छोराकी आमा सालुको श्रीमानको करिब दुई महिना अघि निधन भएको थियो । श्रीमानको निधनपछि एक्लो बनेकी उनी सोमबार बिहानै किनमेलका लागि निस्किएकी थिइन् । तर विराटनगर बसपार्क आईपुगेपछि प्रसव पिंडाले च्याप्यो । बसपार्क पश्चिम तर्फको सडक किनारमा अडेस लागेकी उनले त्यहीँ छोरा जन्माइन् ।, यो समाचार आजको उद्घोष दैनिकमा छापिएको छ ।
