२२ असार, विराटनगर ।
मोरङको बुढीगंगा गाँउपालिकामा विद्यार्थी बोक्ने बस सडकबाट पल्टिएर नहरमा खसेको छ । १८ जना विद्यार्थी बोकेर स्कुलतर्फ गईरहेको बस आइतबार बिहान सुनसरी मोरङ सिँचाइ आयोजनाको नहरमा खसेको हो ।
गोकुवा नजिकैको नहरमा बस पल्टँदा त्यसमा सवार दुई जना शिक्षक गम्भीर घाइते भएका छन् । घटनामा केही विद्यार्थी सामान्य घाइते छन् । शिक्षकहरुलाई उपचारको लागि तत्कालै विराट मेडिकल कलेज पठाइएको जिल्ला प्रहरी कार्यालय मोरङले जनाएको छ ।
स्थानीय जेभियर्स बोर्डिङ स्कुलको को १ ख १९८२ नम्बरको बस विद्यार्थी लिन जाने क्रममा अनियन्त्रित भई डिलबाट चिप्लिएर नहरमा खसेको प्रत्यक्षदर्शीले जनाएका छन् । दुर्घटना लगतै तत्काल सवैको उद्दार गरिएको स्थानीय बलबीर चौधरीले जानकारी दिए ।
