२३ असार, विराटनगर ।
प्रदेश १ सरकारले विराटनगरको रानीमा फलफुल तथा तरकारीको विषादी प्रयोगशाला सञ्चालनमा ल्याएको छ । संघीय सरकारले तरकारी तथा फलफुल भित्र्याउँदा विषादी परिक्षण गर्ने भन्ने निर्णय तत्काल कार्यान्वयन नहुने भनिरहेको बेला प्रदेश सरकारले विषादी अवशेष द्रुत विश्लेषण प्रयोगशाला सञ्चालनमा ल्याएको हो ।
प्रयोगशाला सञ्चालनका लागि काठमाण्डौबाट प्राविधिकसहितको टोली ल्याइएको प्रदेश १ सरकार भूमी व्यवस्था, कृषि तथा सहकारी मन्त्रालयले जनाएको छ ।तरकारी तथा फलफुलमा रहेको विषादीको अवशेष परीक्षण गर्न स्थापना गरिएको सो प्रयोगशाला सोमबारदेखि सञ्चालनमा आउने भूमी व्यवस्था, कृषि तथा सहकारी मन्त्रालयका सचिव हस्तबहादुर बिष्टले जानकारी दिए ।
उनले प्रयोगशाला स्थापना भएसँगै अब विराटनगरबाट नै तरकारी र फलफुलको विषादी मापन हुने बताए । प्रयोगशाला करिब २५ लाख रुपैयाँको लागतमा सञ्चालनमा ल्याइएको हो ।
