२४ असार, विराटनगर ।
सरकारले आयात गरिएका तरकारी र फलफूलका लागि अनिवार्य गरेको विषादी परीक्षण तत्काल स्थगित गरेको बेला विराटनगरमा भने विषादी परीक्षण सुरु भएको छ । बाली संरक्षण प्रयोगशालामा ‘विषादी अवशेष द्रुत विश्लेषण प्रयोगशाला’ स्थापना गरि सोमबारदेखि विषादी परीक्षण सुरु गरिएको हो ।
२५ लाखको लगानीमा निर्माण भएको उक्त ल्याबको परीक्षण र प्राविधिकलाई आवश्यक तालिम काठमाडौंबाट आएको प्राविधिक टोलीले ३ दिनसम्म गरेको थियो। उक्त तालिम सम्पन्न भएसँगै सोमबारदेखि ल्याब पूर्णरूपमा सञ्चालन गर्नसक्ने क्षमतामा रहेको १ नम्बर प्रदेश भूमि व्यवस्था, कृषि तथा सहकारी मन्त्रालयका सचिव हस्तबहादुर विष्टले जानकारी दिए।
एक नम्बर प्रदेश सरकारको सहयोगमा प्रयोगशाला स्थापना भएपछि विराटनगर भंसार नाकाबाट आयातित तरकारी र फलफूलको विषादी परीक्षणका लागि झापाको विर्तामोड स्थित विषादी परीक्षण केन्द्र जानु नपर्ने भएको छ । प्रयोगशालाका प्राविधिक सहायक घनश्याम बरालका अनुसार पहिलो चरणमा स्थानीय बजारमा ल्याइएका तरकारी र फलफूलहरुको विषादी परीक्षण गरिने र विषादी भेटिए नष्ट गरिने छ । प्रयोगशालामा कार्बोनेट र अर्गानो फस्फेट ग्रुपको विषादीहरुको परीक्षण गर्न शुरु गरिएको उनले जानकारी दिए ।
विषादी परीक्षण प्रयोगशालाका लागि मुख्य चाहिने स्पेक्ट्रोफोटोमिटर र फ्युम हुड लगायतका उपकरणहरु ल्याईसकिएको र अन्य उपकरणहरु जडान गर्ने प्रक्रियामा रहेको बताइएको छ । सचिव विष्टले संघीय सरकारले भारतबाट आयात भएका तरकारीजन्य वस्तुको परीक्षण गर्न अनुमति दिएको खण्डमा काम गर्न सकिने बताए। तर क्वारेन्टाइन र भन्सारसम्बन्धी कार्यक्षेत्र प्रदेश सरकारको भएका कारण तत्कालै भारतबाट आयातित तरकारीजन्य वस्तुको परीक्षणमा कुनै भूमिका नहुने जनाईएको छ ।
