२६ असार, इटहरी ।
सुनसरीको धरानस्थित वी.पी. कोइराला स्वास्थ्य विज्ञान प्रतिष्ठानबाट बिरामी तथा कुरुवा निदाएको मौका छोपी नवजात शिशु चोरी गर्ने २ महिलालाई प्रहरीले बिहीवार पक्राउ गरेको छ । शिशु चोरी गर्ने धरान–५ देवी गाउँ बस्ने २७ वर्षीया लीला बिश्वकर्मा र उनकी भाउजु नाता पर्ने धरान–१५ बगरकोट बस्ने ४२ वर्षीया मिना लिम्बु(विश्वकर्मा)लाई प्रहरीले पक्राउ गरेको हो ।
भोक्राह–नर्सिङ गाउँपालिका–१ बस्ने बविता मेहतालाई सुत्केरी व्यथा लागेर गत असार १० गते वि.पी. प्रतिष्ठान धरान लगिएकोमा १३ गते शिशुलाई जन्म दिए पश्चात आमा र शिशुको सोही अस्पतालको गाईनोवार्डमा राखि उपचार भईरहेको बेला राती करिब साढे १२ बजेको समयमा विरामी कुरुवाले शिशुलाई नदेखे पछि खोजी गर्दा फेला नपरेपछि प्रहरीलाई खबर गरेका थिए ।
शिशुको खोजतलास गर्ने क्रममा केही दिन अगाडी अस्पताल परिसरमा सुत्केरी तथा बच्चाको रेखदेख गर्ने बहानामा आएकी लीला विश्वकर्माले शिशुलाई चोरी गरी मीना लिम्बुको घरमा लुकाईराखेको अवस्थामा बिहीबार बिहान फेला इलाका प्रहरी कार्यालय धरानबाट खटिएको प्रहरी टोलीले फेला पारेको हो ।
नवजात शिशुको उद्धार गरि परिवारको जिम्मा लगाईएको छ भने चोरी गर्ने दुवै जनालाई नियन्त्रणमा लिईएको छ । पक्राउ परेका दुवैजनालाई शरीर बन्धक सम्बन्धि मुद्धामा थप अनुसन्धान भईरहेको इलाका प्रहरी कार्यालय धरानले जनाएको छ ।
