२७ असार, कैलाली ।
कञ्चनपुरको भिमदत्त नगरपालिका–१७ स्थित महाकाली बाल विद्यालयमा कक्षा ९ मा अध्यनरत माधव कलौनीको शिक्षकको कुटाइबाटै ज्यान गएको छ ।
माधवले राम्रो नपढेको भन्दै विद्यालयकी प्रिन्सिपल यशोदा जोशीले असार १३ गते विद्यालयबाट डढेलदुरामा उनका बाबु बृहस्पति कलौनीलाई फोन गरेकी थिइन् । शिक्षिकाले नै माधवलाई प्रहरीको जिम्मा लगाइदिने भन्दै बाबुलाई दबाब दिएपछि उनका बाबु भोलिपल्ट भेट्न आउँदा माधव बर्बराइरहेका थिए ।
कुटपिटबाट कलौनीको दायाँ खुट्टा भाँचिनुका साथै टाउको र छात्तिमा समेत गहिरो चोट लागेको थियो । विद्यालयका शिक्षक दुर्गादत्त पाठकका भतिजसँग माधव र उनका साथीहरुको बाहिर बिवाहमा विवाद परेको रहेछ । त्यही विषयलाई लिएर विद्यालयमा माधव तथा उनका साथीहरुलाई शिक्षकहरुले कुटपिट गरेको रहेछन् ।
उनीसँगै कुटिएका अर्का विद्यार्थीका अनुसार माधवलाई कुटेपछि शिक्षकले पानी समेत पिउन दिएका थिएनन् । माधव र उनका साथीहरुलाई विद्यालयमा कुटपिट भएको बिषय घरमा भनेमा नालामा डुबाइदिन्छु भनेर धम्की दिएको माधवका आफन्त बताउँछन् ।
अहिले माधवको मृत्यु भएको घटना सार्वजनिक भएपछि विद्यालयका प्रिन्सिपल यशोदा जोशी, शिक्षकहरु दुर्गादत्त पाठक, लक्ष्मण भट्ट र हर्क जाग्रीलाई प्रहरीले नियन्त्रणमा लिइसकेको छ ।
