एजेन्सी, असार ३१
यो वर्षकै ब्लकबष्टर बलिउड फिल्म ‘कबिर सिंह’ को सफलतापछि अभिनेता शाहिद कपूरले आफ्नो पारिश्रमिकको दर बढाएका छन् । हालै एउटा समाचारमा जनाइए अनुसार अभिनेता कपूरले आफ्नो पारिश्रमिक ३ करोड भारुबाट बढाएर ३० करोड भारु र्पुयाएका छन् ।
यो फिल्मलाई शाहिद कपूरकै करियरको सबैभन्दा ठूलो सफलताको रुपमा लिइएको छ । त्यसो त कबिर सिंहलाई शाहिदको पहिलो सोलो हिट फिल्म समेत मानिएको छ । यो फिल्मले सोचे भन्दा बढि सफलता हासिल गरेपछि शाहिदको भाउ स्वतः बढ्न पुगेको हो ।
बलिउडकै हट प्रोपर्टी बनेका उनलाई यतिबेला नयाँ नयाँ फिल्मका साथै विज्ञापनहरुबाट समेत प्रसस्त प्रस्तावहरु आउन थालेका छन् । फिल्मका लागि त उनले आफ्नो पारिश्रमिक ३० करोड भारु बताइसकेका छन् । कबिर सिंहका लागि उनलाई ३ करोड भारु पारिश्रमिक दिइएको थियो । करिब सिंहको सफलतासंगै उनले आफ्नो पारिश्रमिकको दर बढाएका हुन् ।
शाहिदले आफ्नो पारिश्रमिकको दर बढाए पनि निर्माताहरुले भने त्यति ठूलो रकम दिन चाहिरहेका छैनन् । शाहिदले अब आफ्नो पारिश्रमिकको दर थोरै घटाउँछन् कि त्यसैमा अडिग रहन्छन् , त्यो हेर्न बाँकी छ ।
