५ साउन, विराटनगर ।
पहिले तिर्दै आएको करमा अचाक्ली वृद्धि गरिएको भन्दै नेपाल औषधि व्यवसायी संघ कोशी अन्चल शाखाले विराटनगर महानगरपालिकाका मेयरलाई ज्ञापनपत्र बुझाएको छ । करको विरोधमा उत्रिएका औषधि व्यवसायी संघमा आवद्ध व्यक्तिहरुले आइतबार र्यालीसहित विराटनगर महानगरपालिकाको कार्यालयमा पुगी मेयर भीम पराजुलीलाई ज्ञापन पत्र बुझाएका हुन् । औषधि व्यवसायी संघ कोशी अन्चल शाखाको तर्फबाट अध्यक्ष कुमार खतिवडाले मेयर पराजुलीलाई ज्ञापनपत्र हस्तान्तरण गरे ।
गत आर्थिक वर्ष २०७५÷०७६ को अन्तिममा कर तिर्ने बेलामा महानगरले व्यवसायको कर वृद्धि गरेको थाहा पाएपछि व्यवसायीहरुले कर संशोधनको माग राख्दै ज्ञापन पत्र बुझाएका हुन् । नेपाल औषधि व्यवसायी संघ कोशी अन्चल शाखाका महासचिव हरिबोल श्रेष्ठले आर्थिक वर्ष २०७४÷०७५ को तुलनामा २०७५÷०७६ देखि औषधि व्यवसायी संघसँग सहकार्य नगरी औषधि पसललाई अवैज्ञानिक रुपमा वर्गीकरण गरी अप्रत्यासित रुपमा व्यसायिक कर वृद्धि गरेकोले आन्दोलन गर्नुपरेको बताए । उनले महानगरले व्यवसाय करमा ५ गुणासम्म वृद्धि गरेको भन्दै तत्काल कर संसोधन गर्नुपर्ने बताए ।
मेयर पराजुलीलाई ज्ञापन पत्र बुझाउँदै औषधि व्यवसायी संघले उक्त विषय ५ दिनभित्र सम्बोधन नभए महानगरभित्र चरणबद्ध आन्दोलन गर्ने समेत चेतावनी समेत दिएको छ । औषधि व्यवस्था विभागले पूँजीको आधारमा दर्ता एवम् नवीकरण शुल्क लिने गरेको जनाउँदै संघले औषधि व्यवस्था विभागले समेत पुँजीको आधारमा सम्बोधन नगरेकोमा महानगरका अधिकारी र कर्मचारीले स्वविवेकले औषधि पसललाई साना, मझौला र ठूला भनी वर्गीकरण गर्नु महानगरको अपरिपक्वता भएको बताएको छ । संघले औषधि व्यवस्था विभागले तोकेको पुँजीको आधारमा वर्गीकरण गरी विभागले लिने शुल्कको आधारमा व्यसायिक कर निर्धारण गर्न महानगरसँग माग गरेको छ ।
