५ साउन, पाँचथर ।
पहिरोले ४ दिनयता ठप्प मेची राजमार्ग आइतबार दिउँसोदेखि एकतर्फी रुपमा सञ्चालनमा आएको छ ।
फाल्गुनन्द गाँउपालिका ३ स्थित फिदिम राँके सडक खण्डको पांग्रे भीरमा गएको पहिरोले बुधबार रातिदेखि राजमार्ग ठप्प भएको थियो । सडकमा झरेको पहिरो पन्छाएर यातायात सञ्चालनमा ल्याइएको पाँचथरका प्रमुख जिल्ला अधिकारी मुरारी वस्तीले जानकारी दिए ।
अहिले राजमार्गमा झरेको पहिरो पन्छाउने काम भइरहेको छ । माथिबाट पहिरो झर्ने क्रम पनि जारी भएकाले ठूला सवारी साधान वारपार गराउन समस्या भएको उनको भनाइ छ । सडकमा पहिरो झर्न नरोकिएकाले वैकल्पिक मार्ग पनि तयारी भइरहेको छ । गम्बा डाँडाबाट राँके निष्कने गरी वैकल्पिक मार्ग निर्माण गरिएको हो ।
नौ किलोमिटरको वैकल्पिकमार्ग निर्माण गरिएको हो। मेची राजमार्गको पहिरो पन्छाउने काम सडक कार्यालय इलामले गरेको हो। वैकल्पिक मार्ग मर्मत गरेर सञ्चालन गर्नका लागि प्रदेश सरकारले आर्थिक सहयोग गरेको गरेको छ ।
