७ असार,मोरंग ।
बक्राहा खोलाको बाढीले बस्ती कटान गर्न थालेपछि जनप्रतिनिधि र स्थानियबासीले श्रमदान गरेर कटान नियन्त्रण गरेका छन् ।
बाढीका कारण हुने कटान नियन्त्रण गर्न उर्लाबारी नगरपालिका–८ को बक्राहा किनारमा ३ सय मिटर बाँसको पाइलिङ निर्माणगरि कटान नियन्त्रण गरिएको छ । असार २८ गते खोलामा आएको बाढीपछि कटानका कारण उर्लाबारी नगरपालिका–८ स्थित बगरटोलका ६ सन्थाल परिवार बिस्थापित भएका छन् । उनीहरुले स्थानिय राजघाटस्थित एक विद्यालयमा शरण लिएका छन् ।
कटान जारी रहँदा उर्लाबारीसहित पथरी तथा रतुवामाईका बस्तीहरु समेत जोखिममा परेको देखेर स्थानिय,जनप्रतिनिधि र प्रहरी टोलीको सहयोगमा बाँसबाट पाइलिङ गरिएको समाजसेवी नारायण बस्नेतले जानकारी दिए । प्रदेश १का सांसद कुलप्रसाद साम्बाको पहलमा बाँसको पाइलिङ निर्माण गरिएपछि अहिले कटान नियन्त्रण भएको स्थानीयले बताएका छन् ।
बर्षौँ अघिबाट कटान र बाढीको समस्या झेल्दै आएका उर्लाबारी बगरटोलका बासिन्दाले स्थायी तटबन्ध निर्माण गर्न माग गर्दै आएपनि अहिलेसम्म पुरा हुन सकेको छैन । बक्राहा खोलाको कटान नियन्त्रण गर्न स्थायी तटबन्ध निर्माण गर्ने पहल भइरहेको सांसद साम्बाले बताए । २०७४ सालमा आएको बाढीका कारण उर्लाबारी ८ को क्षेत्रबाट १४ सन्थाल परिवार समेत विस्थापित भएका थिए ।
