१२ साउन, विराटनगर ।
विराटनगरस्थित ट्राफिक चोकमा युवाहरुले शनिबारदेखि क्लोथ बैंक सञ्चालनमा ल्याएका छन् । भुषण पोमो लिम्बु र पेरिस सुवेदीको संयुक्त पहलमा क्लोथ बैंक सञ्चालनमा ल्याईएको हो । क्लोथ बैंकमा युवाहरुले पुरानो लुगा संकलन गरेर विपन्न र गरिबलाई वितरण गर्ने गरेका छन् ।
संयोजक पेरिस सुवेदीले लगाउन सकिने पुराना लुगालाई सफा गरेर लगाउन योग्य बनाई विपन्न र गरिबहरुलाई वितरण गरिने बताए ।उनले प्राकृतिक प्रकोपका कारण पीडित भएका कतिपय व्यक्तिहरुले कपडा नै लगाउन नसक्ने अवस्था भएको भन्दै पुरानो कपडालेनै भएपनि उनीहरुको अनुहारमा खुसी ल्याउन सक्ने बताए ।
त्यस्तै अर्का संयोजक भुषण पोमो लिम्बुले क्लोथ बैकमा धैरैले पुराना लुगा दिएको र शनिबारमात्रै पनि ५० जनाभन्दा बढी विपन्न व्यक्तिले कपडा लगेको जानकारी दिए । उनले त्यहाँबाट रहन जाने बाँकी कपडालाई आवश्यकता अनुसार विराटनगर आसपासको क्षेत्रमा लगेर वितरण गरिने बताए ।
क्लोथ बैंकमा पुराना लुगा दिने र लानेको नाम गोप्य राखिने जनाईएको छ ।
