११ साउन, मोरङ ।
नेपाली सेनाको सूर्यदल गण र सैनिक श्रीमती संघले मोरङको कटहरीका बाढी पीडितलाई राहत वितरण गरेको छ । नेपाली सेनाको सूर्यदल गण थलहा ब्यारेक र सैनिक श्रीमती संघले आइबतार कटहरी गांउपालिका परिसरमा कार्यक्रमको आयोजना गर्दै पीडित परिवारहरुलाई राहत वितरण गरेको हो ।
सो क्रममा वडानम्बर १,२ र ६ का बाढी तथा डुबान प्रभावित पिछडिएका तथा विपन्न वर्गका परिवारलाई राहत वितरण गरिएको छ । पूर्वी पृतना हेडक्वाटर इटहरीका निमित्त पृतनापति सहायक रथी यामप्रसाद ढकाल,मोरङका प्रमुख जिल्ला अधिकारी रमेशकुमार केसी,कटहरी गांउपालिकाका अध्यक्ष रामकुमार कामत उपाध्यक्ष मन्जिता सरदार र सूर्य दल गणका प्रमुख सेनानी राघुनाथ पौडेलले पीडितहरुलाई राहत वितरण गरेका थिए ।
कार्यक्रममा १ सय ९५ घर–परिवारलाई राहत वितरण गरिएको गाउँपालिकाका प्रमुख प्रशासकीय अधिकृत गणेश कार्कीले जानकारी दिए । उनले पीडितहरुलाई प्रति परिवार राहतस्वरुप हरियो मण्डी १ थान,मेट्रस फोम १ ,झुल र त्रिपाल १÷१ र ड्रिंकिङ वाटर १ कार्टुन राहतस्वरुप प्रदान गरिएको बताए । कार्यक्रममा जिल्ला प्रहरी कार्यालय मोरङका एसपी विश्व अधिकारी लगायतको सहभागिता थियो ।
