साउन १६, विराटनगर । विभिन्न कारणले मलेसियामा अवैधानिक भएर बसेका नेपालीसहित सबै विदेशी नागरिकलाई त्यहाँको सरकारले आज बिहीबारदेखि घर फर्किने अवसर दिएको छ ।
आज अगस्ट १ देखि आउँदो डिसेम्बर ३१ तारिखसम्मको लागि अवैधानिक विदेशी नागरिकलाई आममाफीको समय दिइएको हो ।
मलेसिया सरकारले ल्याएको ‘ब्याक फर गूड’ कार्यक्रममार्फत अवैधानिक रुपमा बसेका सबै विदेशी नागरिक यसमा समावेश भएर स्वदेश फर्किन पाउनेछन् । भिसा र पासपोर्टको म्याद सकिएर अवैधानिक रुपमा मलेसियामा बसिरहेका सबैले यो समयभित्र आ–आफ्नो देश फर्किसक्नुपर्नेछ ।
यो कार्यक्रम अवैधानिक रुपमा मलेसियामा बसेका नेपाली कामदारको लागि निकै ठूलो अवसर भएको मलेसियास्थित नेपाली दूतावासका द्वितीय सचिव महेश त्रिपाठीले बताएका छन ।
इमिग्रेसनका ओभरस्टेबाहेकका अरु समस्यालाई यसले सम्बोधन नगर्ने पनि उनले प्रष्ट पारेका छन । कामदारले स्वदेश फर्किनको लागि मलेसियन सरकारलाई जरिवानास्वरुप ७ सय रिंगिट र राहदानी नभएकाहरुले एकतर्फी यात्रा अनुमति पत्रको लागि १६० रिंगिट तिर्नुपर्ने हुन्छ ।
एकतर्फी यात्रा अनुमति पत्र बनाएर मलेसिया सरकारले तोकेको अध्यागमन कार्यालय जानुपर्छ । त्यहाँ गएर आवेदन दिन नेपाल फिर्ता हुने हवाई टिकटको प्रतिलिपि अनिवार्य लैजानुपर्ने हुन्छ । नेपाल फिर्ता हुने हवाई टिकटमा नेपाल जाने मिति अध्यागमन कार्यालय गएको ७ दिनभित्रको हुनुपर्नेछ । अध्यागमनमा जाँदा व्यक्ति स्वयं नै उपस्थित हुनुपर्छ । व्यक्ति स्वयं उपस्थित हुन नसक्ने अवस्थामा दूतावासको मान्छे आउनुपर्ने हुन्छ । तर तेस्रो पक्षलाई नल्याउन दूतावासको आग्रह छ ।
आवेदन भरिदिने तथा सस्तोमा नेपाल फर्काइदिन्छु भन्दै ठूलो रकम असुल्नेहरुको बिगबिगी हुने भएकोले त्यसबाट जोगिन दूतावासले सचेत गराएको छ ।
फारम दूतावासले निःशुल्क भरिदिन्छ, जरिवानास्वरुप मलेसियन दूतावासलाई ७ सय रिंगिट, ट्राभल डकुमेन्टको १ सय ६० रिंगिट भन्दा बढी नदिन तथा हवाइजहाज टिकट आफैंले काट्नुपर्ने दुतावासले जनाएकोछ ।
भिसाको म्याद सकिएर अवैधानिक भएकाहरुलाई बाटोमा भेटाए प्रहरीले समातेको खण्डमा मलेसियाले ल्याएको यो कार्यक्रम र आफू त्यसैको लागि जान लागेको कुरा खुलेर भन्न दूतावासले आग्रह गरेको छ ।
आफूले सम्झाउँदा सम्झाउदै पनि यदि प्रहरीले समात्यो भने दूतावासको हटलाइन नं. १६२४७२७७७,०३२०२०१८९८२०२०१८९९,०३२०२०१९०१ मा सम्पर्क गर्न सकिन्छ ।
