साउन १७, रासस । पछिल्लो समय मुलुकभर जबर्जस्ती करणीका घटनामा वृद्धि भएको छ ।
प्रहरी प्रधान कार्यालयका अनुसार करणीका घटनामा बृद्धि भएका हुन् । प्रहरीले आर्थिक वर्ष २०७५÷७६ मा एक हजार ८ सय ७३ मुद्दा दर्ता गरेको छ । जुन गत आर्थिक वर्ष २०७४÷७५ को भन्दा बढी हो ।
आर्थिक वर्ष २०७४÷७५ मा एक हजार ४ सय ८० मुद्दा दर्ता भएका थिए । आर्थिक वर्ष २०७३÷७४ मा भने एक हजार १ सय ३७ मुद्दा दर्ता भएका थिए । केन्द्रीय प्रहरी प्रवक्ता एवं प्रहरी नायब महानिरीक्षक विश्वराज पोखरेल समाजिक चेतना स्तरबृद्धि भएका कारण घटनाहरु बढेको बताउँछन् ।
जबर्जस्ती करणीका घटना हिजोका दिनमा लुकाउने गरेपनि पछिल्लो समय प्रहरीलाई सूचना दिने प्रवृत्तिका कारण यस्ता घटनामा वृद्धि आएको उनको भनाई छ ।
कुनै पनि महिलाको इच्छा बेगर जबर्जस्ती रूपमा यौन सम्पर्क गर्न खोज्नुलाई जबर्जस्ती करणी भनिन्छ ।
प्रहरी प्रवक्ता पोखरेल आफूले चिनेका व्यक्ति, आफ्नो नाता सम्बन्ध र छरछिमेकका व्यक्तिबाट धेरै जबर्जस्ती करणीका घटना हुने गरेको बताउँछन् ।
