साउन १८, विराटनगर । प्रदेश १ सरकारले प्रदेशमा ३ वटा आयुर्वेद केन्द्र र प्रदेशमा भएका सबै जडीबुटीको सुचीकरण गर्दे वैद्यखाना संचालन गर्ने तयारी गरेको छ ।
नेपाल आयुर्वेद औषधि व्यवसायी संघ मोरङको अधिवेशन उद्घाटन सत्रमा प्रदेश १ का सामाजिक विकास मन्त्री जिवन घिमिरेले यस्तो जानकारी दिएका हुन ।
आयुर्वेद चिकित्सा पद्धति संकटमा परेको बताउदै मन्त्री घिमिरेले प्रदेश सरकार सामाजिक विकास मन्त्रालय स्वास्थ्य जिवन अभियान संचालन गर्ने अभियानमा जुटेको पनि बताए ।
जिल्ला आयुर्वेद अस्पतालका लागि प्रदेश सरकारले आवश्यक नीति नियम बनाएर अगाडि बढेको उनले जानकारी दिए । विगतमा राज्यले नै आयुर्वेदिक उपचार पद्धतिलाई वैकल्पिक पद्धतिमा राखेका कारण यो पछाडि परेको उनले बताए ।
आयुर्वेद मुल प्रवाहीकरण रहेको बताउदै मन्त्री घिमिरेले अब प्रदेश सरकारले आयुर्वेदलाई पहिलो प्राथमिकतामा राख्ने प्रतिबद्धता जनाए । अधिवेशनको उद्घाटन सत्रमा सहभागिहरुले आयुर्वेद चिकित्सा पद्धति संकटमा परेको बताएका थिए ।
कार्यक्रममा बोल्दै नेपाल आयुर्वेद औषधि व्यवसायी संघ प्रदेशका सचिव जिपी तिवारीले आयुर्वेद चिकित्सा पद्धति छायामा परेको गुनासो गरे ।उनले यसका लागि सरकारी निकायले प्राथमिकतामा राखेर काम गर्नुपर्ने बताए ।
यस्तै नेपाल आयुर्वेद औषधि व्यवसायी संघ मोरङका सदस्य गंगा साहले आयुर्वेद चिकित्सा पद्धतिलाई सरकारले प्राथमिकतामा राख्नु पर्नेमा जोड दिए।
