२१ साउन, सप्तरी ।
सप्तरीको सुरुङ्गा नगरपालिका वडा नं ७ का महिला किसान समूहले तरकारी खेतीबाट मनग्गे आम्दानी गर्न थालेको छ । उनीहरुका खेतबारीमा लटरम्म फलेका घिरौला , भिन्डी , तितेकरेला जस्ता तरकारीले मनै लोभ्याउने गरेको छ । सेभ द चिल्ड्रेनको सहयोगमा सवल नेपालको आयोजनामा समुन्नति परियोजना अन्तर्गत राधाकृष्ण कृषक समूह सुरुङ्गा नगरपालिका वडा नं ७ चकदहका लक्षित वर्ग समुदायका महिलाहरु पनि व्यबसायिक तरकारी खेतीमा जुटेका छन् ।
समूहका १८ जना सदस्यले डेढ बिघा जमिनमा व्यावसायिक तरकारी खेती गर्दै आएका छन् । तरकारी खेतीबाट भएको आम्दानीले उनीहरूको पारिवारिक जीवनस्तरमा सुधार भएको समूहकी अध्यक्ष राजबत्ती देबी कामतले बताइन् । समूहका किसानहरु करिब डेढ बिघा खेती गर्दा मासिक रुपमा एक जना किसानले २० हजारसम्म आम्दानी गर्ने गरेको उनले बताइन् ।
दुई वर्षदेखि व्यावसायिक तरकारी खेती गर्दै आएकी समूहकी सचिब सचिनकुमारी चौधरीले तरकारी खेतीबाट आफू निकै सन्तुष्ट रहेको बताइन् । सिरहाको लहान , कदमाहा, कुशहा लगायतका स्थानमा बजार रहेका कारणले बजारीकरणको खासै समस्या नभएका कारणले अरू कामभन्दा पनि घरपरिवार तरकारी खेतीमै सक्रिय भएको चौधरीले बताइन् ।
समूह बनाएर अगाडि बढेपछि व्यावसायिक तरकारी खेतीमा सरकारी , गैरसरकारी सहयोग पनि पाउन थालेको समूहकी सदस्य जानकी चौधरीले जानकारी दिइन् । उनले संस्थाबाट समय समयमा बिउबिजन, उपकरण, सिँचाइसुविधा लगायत प्राविधिक सहयोग भएको बताइन् । तरकारी खेतीबाट भएको आम्दानीले पारिवारिक खर्च धान्न सहज भएको उनीहरुको कथन रहेको छ ।
