विराटनगर : विराटनगर भन्सार नाकाबाट मात्रै गत आर्थिक वर्षमा भारतबाट ३९ करोड ५५ लाख ५३ हजार मुल्य बराबरको तरकारी आयात भएको छ । विषादीका कारण सरकारले विना जाँच तरकारी आयात गर्न नदिएपछि भने विराटनगर भन्सार नाका भएर न्युन परिमाणमा आयात हुन थालेको छ ।
विराटनगर भन्सारले उपलब्ध गराएको तथ्यांक अनुसार सो नाका भएर गत आबमा आलु, प्याज, खुर्सानी, सुकेको लसुन, विभिन्न खाले हरियो तरकारी, केराउ, बोडी, चना, दाल, कागती आदि आयात भएको थियो ।
त्यस्तै फलफुल पनि ३८ करोड ९ लाख ६५ हजार मुल्य बराबरको आयात भएको छ ।फलफुलमा नरिबल, सुपारी, आँप, लिच्ची, खरबुजा, स्याउ आदि आयात भएको छ । फलफुल र तरकारी आयातबाट राज्यलाई १० करोड ७९ लाख २० हजार १० करोड राजस्व प्राप्त भएको छ ।
विराटनगर भन्सारमा विषादी जाँच गर्ने सुविधा नभएकोले विषादी जाँच गर्ने व्यापारी झापाको विर्तामोड पुग्नुपर्ने बाध्यता छ । विराटनगरका तरकारी व्यापारी सत्यनारायण भगत विराटनगरमा विषादी जाँच गर्ने प्रयोगशाला भएर पनि त्यसलाई भन्सारले मान्यता नदिने गरेकोले अनावश्यक झन्झट बेहोर्नुपरेको गुनासो व्यक्त गर्दछन् ।
उनका अनुसार विराटनगरको प्रयोगशालामा भएको जाँचलाई सुनसरी भन्सारले भने मान्यता दिने गरेको छ । ,यो समाचार आजको उद्घोष दैनिकमा छापिएको छ ।
