२२ साउन, विराटनगर ।
प्रदेश नम्बर १ को सरकारले यातायात ब्यवस्था कार्यालय झापा र सुनसरीलाई वायो मेट्रिक दर्ताकालागी टोकन मेशिन उपलब्ध गराइएको छ । कार्यालयहरुले गर्ने सेवाप्रवाहलाई सहज बनाउन प्रदेश न १ को भौतिक पूर्वाधार विकास मन्त्रालयले सो दुई कार्यालयलाई टोकन मेशिन उपलब्ध गराएको हो ।
विराटनगरमा आयोजित एक कार्यक्रममा प्रदेश एकका मुख्यमन्त्री शेरधन राई र आर्थिक मामिला तथा योजना मन्त्री ईन्द्रबहादुर आङ्बोले कार्यालयका प्रमुखलाई सो मेशिन हस्तान्तरण गरेका हुन ।
सात लाख रुपैँयाको लागतमा मेशिन खरिद गरिएको सडक तथा यातायात व्यवस्था कार्यालयका प्रमुख ईन्जिनियर रेवतीरमण पराजुलीले बताए । लाइनमा उभिनुपर्ने झन्झटबाट सेवाग्रहीलाई मुक्त गराउन प्रदेशले सो मेशिन उपलव्ध गराएको भन्दै अन्य कार्यालयमा पनि यस्तै मेशिन उपलव्ध गराउने तयारीमा मन्त्रालय रहेको उनले बताए ।
टोकन मेशिन सुचारु भएपछि सेवाग्राहीलाई सहजता हुने इटहरीस्थित यातायात ब्यवस्था कार्यालय, सवारी चालक अनुमति पत्र शाखाकी कार्यवहाक प्रमुख बिन्दाकुमारी नेपालले बताइन् । उनले मन्त्रालयले प्रदान गरेको मेशिनलाई एकसाता भित्र इन्सटल गरि सुचारु गरिने बताइन ।
मेशिनबाट टोकन सेवा सुचारुभएपछि विशेषगरि लाईसेन्स लिने क्रममा बायोमेट्रिककालागि आउने सेवाग्राहीलाई लामो समय लाम लागेर बस्नुपर्ने अवस्थाको अन्त्य भएर सहजता हुने उनले जानकारी दिइन् । सो कार्यालयमा दैनिक ३ सयदेखि ५ सय सेवाग्राही बायोमेट्रिककालागि पुुग्ने गरेको उनले बताइन् ।
