साउन ३०, झापा । सीमाक्षेत्रबाट बढ्दो चेलीबेटी बेचबिखन रोकथाम तथा महिलामाथि हुने हिंसाजन्य घटना न्यूनीकरणको उद्देश्य राखेर झापाका मारवाडी समुदायका महिलाहरूले राष्ट्र सेवक कर्मचारीसँग रक्षा बन्धन मनाएका छन् ।
बिहीबार हिन्दु धर्मावलम्बीहरूको रक्षा बन्धन अर्थात् जनपूर्णिमाको अवसरमा भद्रपुर मारवाडी महिला मञ्च तथा मारवाडी युवती मञ्चमा आबद्ध महिलाहरूले नेपाल प्रहरी, सशस्त्र प्रहरी र भन्सार कर्मचारीको नाडीमा राखी बाँधेर उनीहरूसँग रक्षा बन्धन मनाएका हुन ।
भद्रपुर मारवाडी महिला मञ्चकी अध्यक्ष निक्की साहेवालाको नेतृत्वमा गएका महिलाहरूको टोलीले वडा प्रहरी कार्यालय भद्रपुरका प्रहरी निरीक्षक यमकुमार श्रेष्ठसहित वडामा कार्यरत सम्पूर्ण प्रहरी कर्मचारीलाई राखी बाँधेका थिए ।
त्यस्तै महिलाहरूले सशस्त्र प्रहरी बल नेपाल गण हेकुवा झापा नम्बर २ गणले खटाएका भद्रपुरका सीमा क्षेत्रमा तैनाथ सम्पूर्ण सशस्त्र प्रहरी र भद्रपुर भन्सार कार्यालयका कर्मचारीलाई पनि राखी बाँधेका थिए । साथै उनीहरूले वडा कार्यालयमा रहेका थुनुवा र झापा कारागारका कैदीबन्दीलाई समेत राखी बाँधेको बताइएको छ ।
रक्षा बन्धन कार्यक्रम पश्चात् राष्ट्र सेवक कर्मचारीले मारवाडी महिलाहरूलाई दक्षिणा दिन खोजेका थिए ।
तर, नगद दक्षिणा भन्दा पनि महिलाहरूले बढ्दो चेलीबेटी बेचबिखन रोकथाम तथा महिलामाथि हुने हिंसाजन्य घटना न्यूनीकरण गरिदिन आग्रह गरेकी थिइन् ।
