२ भदौ, मोरङ । मोरङको बुढीगंगा गांउपालिका–४ पोठियाका १७ बर्षिय युवा नौशाद मियां निर्मम ढंगले कुटिएका छन्।
मियांलाई घर नजिकैको नहर किनारको बांस भ्याङमा लगेर कुटपिट गरिएको भिडियो सार्वजनिक भएको छ ।
कुटपिट गर्नेक्रममा पीडकहरुले नै बनाएको भिडियो लिक भएर सार्वजनिक भएपछि पीडित परिवारले पीडकलाई कारवाही गर्न गुहार माग्दै जिल्ला प्रहरी कार्यालय मोरङमा निवेदन दिएका छन् ।
स्थानीय २२ बर्षिय सादिर मियां,२० बर्षिय अंसद मियां,२१ बर्षिय आकिप मियां र १८ बर्षिय अफजल मियांले पीडित युवा नौशादलाई घर नजिकैको बांस झ्यांङमा लगेर बेल्ट र बुटले निर्घात कुटपिट गरेको पीडित पक्षले जनाएका छन् ।
कुटपिट गर्नेमध्यैकै अफजलले बनाएको भिडियो शेयर गर्ने क्रममा लिक भएपछि घटना सार्वजनिक भएको हो । साउन ३० गते बिहिबार सांझको घटना भएपनि पीडक युवाहरुले घटनाका बिषयमा कसैलाई भने ज्यान मारिदिने धम्की दिएका कारण पीडितले हालसम्म घटना लुकाएको बताएका छन् ।
स्थानीय एक युवाको मोबाईल चोरी गरेको आशंकामा ती युवाहरुले नौशादलाई कुटपिट गरेको हुनसक्ने स्थानीयले आशंका ब्यक्त गरेका छन्। तर पीडित युवाले मोबाईल चोरीमा आफ्नो कुनै हात नरहेको र सो बिषयमा आफुलाई जानकारी समेत नभएको बताएका छन् ।
घटनामा संलग्न चारैजना युवाहरु लागू औषध दुब्र्यसनी रहेको स्थानियले बताएका छन । पीडित युवा आफ्ना बाबु अलिम मियांसंगै राजमिस्त्रीको काम गर्दै आएका छन् ।
