२ भदौ, काठमाडौं । एभीसी एसियन सेन्ट्रल जोन सिनियर पुरुष भलिबल च्याम्पियनसिपका लागि नेपाली टोलीबाट विशाल विक र विनोद चन्द बाहिरिएका छन् ।
नियमअनुसार टोलीमा १२ जना खेलाडीमात्रै राख्न पाउने भएकाले प्रशिक्षक हान एबिङले आइतबार अपोजिट स्पाइकर विशाल विक र लिवेरो विनोद चन्दलाई टोलीबाट बाहिर राखेको हो ।
प्रशिक्षक एबिङले आइतबार साँझसम्म नै १४ सदस्यीय टोलीलाई नियमित प्रशिक्षण गराउदै आइरहेका थिए ।
अन्तिम समयमा टिमबाट फालिएपछि खेलाडीद्धयले गुनासो पोखेका छन् । विनोद चन्द बाहिरिएसँगै टोलीमा एक लिवेरो इश्वर थापामगर मात्रै रहेका छन् ।
यस्तै अफगानिस्तानसँगको मैत्रीपुर्ण खेलमा चोट बोेकेका कप्तान इम बहादुर राना र ओपन स्पाइकर धन बहादुर बाट टोलीको प्रशिक्षणमा फर्किएका छन् ।
नेपालले आज बलियो किर्गिस्तानसँग खेल्दै सेन्ट्रल जोन भलिबल च्याम्पियनसिपको सुरुवात गर्दैछ । खेल केही समयपछि लगनखेलमा रहेको आर्मीको कभर्डहलमा हुदैछ ।
