६ भदौ, विराटनगर
हिन्दुहरुको विशेष पर्वका रुपमा रहेको श्रीकृष्ण जन्माष्टमी आज धुमधामका साथ मनाइँदैछ । प्रत्येक वर्ष भाद्र कृष्ण अष्टमीका दिन मनाइने श्रीकृष्ण जन्माष्टमी पर्व आज भगवान् श्रीकृष्णको पूजा आराधना गरी मनाइन्छ ।
भगवान् श्रीकृष्णको जन्म द्वापरयुगको अन्त्यतिर भाद्रकृष्ण अष्टमीको मध्यरातमा भएको सम्झनामा आजको दिनमा श्रीकृष्ण जन्माष्टमी पर्व मनाउने गरिएको हो । शास्त्रानुसार दुर्जनको विनाश गरी सज्जनको रक्षाका लागि भगवान् विष्णुको आठौँ अवतारका रुपमा श्रीकृष्णको जन्म भएको हो ।
कंशको अमानवियताबाट मानव जातिलाई मुक्ति दिनका लागि वासुदेव र देवकीको आठौँ सन्तानका रुपमा आजको दिन श्रीकृष्णको जन्म भएको धार्मिक विश्वास छ । कंशले कारावासमा बन्दी बनाएको अवस्थामा देवकीबाट श्रीकृष्णको जन्म भएको कथा छ ।
श्रीकृष्णले पापि मामा कंशको बध गरी हजुरबा उग्रसेन, माता–पिता देवकी एवम् वासुदेवलाई जेलमुक्त गरेको किम्वदन्ति छ ।
कुरुक्षेत्रमा भएको धर्मयुद्धमा सत्यको पक्षमा रहेका पाँच पाण्डवका साथमा कृष्णले साथ दिएका थिए । कुन्ती पुत्र अर्जुनको सारथीका रुपमा श्रीकृष्णले अर्जुनलाई प्रेरणा दिँदै सत्यको पक्षमा लड्न हौसला प्रदान गरेका थिए ।
कौरव र पाण्डवका बीचमा चलेको युद्धका क्रममा श्रीकृष्णले अर्जुनलाई दिएको उपदेश ‘श्रीमद्भगवत् गीताले हिन्दुधर्ममा विशेष महत्व राख्दछ । हिन्दूको पवित्र ग्रन्थको रुपमा श्रीमद्भगवत् गीता रहेको छ ।
श्रीकृष्णका रुपमा भगवान विष्णुले मानव जीवन धारण गरी सत्कर्मका लागि मानव समुदायको रक्षा र मानवलाई सहि दिशामा लाग्न अभिप्रेरित गरेका थिए ।
आजको दिन काठमाडौ र देशभरका अन्य कृष्ण मन्दिरमा भव्य रुपमा पूजा, आराधना गरी श्रीकृष्ण जन्माष्टमी पर्व मनाउने गरिन्छ । विशेषगरी महिलाहरु व्रत बसी राति १२ बजे श्रीकृष्ण जन्मिएको सम्झनामा पूजा गर्ने र रातभर जाग्राम बसेर श्रीकृष्णको भक्तिगान गाउने गर्दछन् ।
जन्माष्टमीका भोली पल्ट देशका विभिन्न स्थानका कृष्ण मन्दिरबाट रथयात्रा र शोभायात्रा समेत निकालिन्छ ।
