९ भदौ, चितवन । स्थानीय प्रशासनले निषेधाज्ञा जारी गरेपछि सोमबार चितवनको भरतपुर शान्त छ ।
पछिल्ला केही दिन यता रवि लामिछानेका समर्थकहरुले दिनहुँ सडकमा प्रदर्शन गर्न थालेपछि स्थानीय प्रशासनले निषेधाज्ञा जारी गरेको थियो ।
निषेधाज्ञापछि सोमबार भरतपुर शान्त देखिएको छ । रवि लामिछाने निर्दोस रहेको दाबीसहित फसाउन खोजिएको भन्दै उनका समर्थकहरुले चितवनमा दिनदिनै प्रदर्शन गरिरहेका थिए ।
प्रदर्शन चर्कर्दै गएपछि स्थानीय प्रशासनले अर्को आदेश नभएसम्मका लागि भरतपुरमा निषेधाज्ञा जारी गरेको हो । निषेधाज्ञाका कारण आज मानिसहरु प्रदर्शनमा उत्रेका छैनन् । प्रहरीले बजार क्षेत्रमा सुरक्षा तैनाथी बढाएको छ ।
पत्रकार शालिकराम पुडासैनी आत्महत्या दुरुत्साहन मुद्दाका आरोपी मध्ये दुईजनाको बयान लिने कार्य सकिएको छ । जिल्ला अदालत चितवनमा युवराज कँडेल र अस्मिता कार्कीको बयान सकिएपछि अहिले रवि लामिछानेको बयान लिने कार्य भइरहेको छ ।
तीनजना प्रतिवादी मध्ये अस्मिता कार्कीको आइतबार नै बयान लिइएको थियो भने बिहान १० बजेपछि कँडेलको बयान लिन थालिएको थियो ।
अब रवि लामिछानेको बयान सकिएपछि अदालतमा वादी प्रतिवादीका वकिलहरुले बहस गर्नेछन् । थुनछेक बहसपछि अदालतले उनीहरुलाई थुनामै राख्ने कि धरौटी वा साधारण तारेखमा छाड्ने भन्ने निर्णय गर्नेछ।
तीनैजनाविरुद्ध आइतबार जिल्ला अदालतमा अभियोगपत्र दर्ता भएको थियो ।
