भदौ १६, एजेन्सी । इंग्लिस प्रिमियर लिग फुटबलमा आर्सनलले टोटनह्याम हट्सपरसँग २–२ गोलको बराबरी खेलेको छ ।
आर्सनलको मैदानमा आइतबार राति भएको ‘नर्थ लन्डन डर्बी’मा २–० ले पछिपरेको अवस्था उल्टाउँदै घरेलु टोलीले खेल बराबरी गरेको हो ।
खेलको पहिलो हाफमा क्रिस्चियन एरिक्सन र ह्यारी केनले एकरएक गोल गर्दै टोटनह्यामलाई २–० को अग्रता दिलाए । तर, दोस्रो हाफमा आर्सनलका एलेक्जेन्डर लाकाजेट् र पिएरे एम्रिक औबामायङ्ले एकरएक गोल गर्दै टोलीलाई खेलमा फर्काए ।
यसैविच, प्रिमियर लिग फुटबलकै अर्को खेलमा एभर्टनले वुल्भरह्याम्पटन वान्डरर्सलाई ३–२ ले हराएको छ ।
खेलमा एभर्टनलाई विजयी गराउन रिचार्लिसनले दुई तथा अलेक्स इओबीले एक गोल गरे । वुल्भरह्याम्पटनका रोमन साइस र राउल जिमिनेजले दुई गोल फर्काए ।
आइतबार रातिका खेलहरुपछि प्रिमियर लिग फुटबलमा ४ खेलबाट १२ अंक जोडेको लिभरपुल शीर्ष स्थानमा रहँदा १० अंकका साथ म्यानचेस्टर सिटी दोस्रो स्थानमा छ । ८ अंक जोडेको लेस्टर सिटी तेस्रो स्थानमा छ ।
क्रिस्टल प्यालेस, आर्सनल, एभर्टन र वेस्टह्याम युनाइटेडको ७-७ अंक छ ।
