१८ भदौ, वीरगञ्ज ।
नेपाली सेनाले बारा र पर्साका हावाहुरी प्रभावितका लागि बनाइदिएको घर बुधबार हस्तान्तरण गरेको छ ।
कार्यवाहक प्रधानमन्त्री एवं रक्षामन्त्री ईश्वर पोखरेल, प्रधानसेनापति पूर्णचन्द्र थापा, र प्रदेश २ का मुख्यमन्त्री लालबाबु राउतले सम्बन्धित स्थानीय सरकार प्रमुखलाई हस्तान्तरण गरेका हुन् ।
वीरगञ्जमा आयोजित कार्यक्रममा हस्तान्तरणका लागि नमुना घर प्रयोग गरिएको थियो । ०७५ चैत १७ गते आएको हावाहुरीबाट घर पूर्ण क्षति भएका ८ सय ६९ वटा परिवारको घर निर्माण गरेको नेपाली सेनाको जनता आवास निर्माण कार्यदलका कमाण्डर विनयविक्रम राणाले जानकारी दिए ।
सेनाले वर्षायाम अघि नै घर निर्माण सक्ने लक्ष्य राखे पनि अविरल बर्षा, निर्माण सामाग्री समयमा उपलब्ध नहुनु, अव्यवस्थित सडक र विवादित घरहरुको कारणले समयमा काम नसकिएको जनाएको छ ।
