१९ भदौ, काठमाडौं ।
ह्याकरहरुले नेपालका नेप्स प्रणालीमा आबद्ध ७ वटा बैंकको कार्ड प्रयोग गरेर नेपाल र भारतबाट गरी ३ करोड ५८ लाख रुपैयाँ रकम झिकेको पाइएको छ ।
एटीएम ह्याकिङ प्रकरणको जाँचबुझका लागि राष्ट्र बैंकले बनाएको समितिले बुझाएको प्रतिवेदन अनुसार चिनियाँ ह्याकरहरुले सो रकम विभिन्न बैंकबाट निकालेका छन् । यसअघि १ करोड ६८ लाख रुपैयाँ निकालेको भनिएको थियो ।
छानबिन टोलीको प्रतिवेदनअनुसार ह्याकरले नेप्समा आवद्ध ७ वटा बैंकका भिसा कार्ड क्लोन गरेर ३ करोड ५८ लाख रुपैयाँ पैसा झिकेका छन् ।
ह्याकरले नेपालबाट १७ बैंकका ६८ एटीएम कार्ड प्रयोग गरेर १ करोड ८९ लाख ४४ हजार रुपैयाँ झिकेका छन् भने भारतबाट नेपालका ६ वटा बैंकको १ करोड ५ लाख ८७ हजार रुपैयाँ झिकेका छन् ।
उनीहरुले भारतीय २४ बैंकका १ सय ३२ एटीएम प्रयोग गरेको पनि अध्ययन समितिको प्रतिवेदनमा उल्लेख छ । ह्याकरले भिसा नेटवर्क र नेप्स स्विचको बीचको प्रणाली नियन्त्रणमा लिएको पनि अध्ययनले देखाएको छ ।
समितिले नेपालका एटीएमको सुरक्षाको लागि अल्पकालीन र दीर्घकालीन गरी सुझाव पनि दिएको छ।
