२२ भदौ, काठमाडौं । काठमाडौंमा सोमबारदेखि विद्युतीय बस चल्ने भएको छ ।
निजी क्षेत्रको सुन्दर यातायातले शुरुमा चारवटा बस सञ्चालनमा ल्याउने तयारी गरेको छ । सोमबार दिउँसो भृकुटीमण्डपमा रहेको नेपाल पुलिस क्लबमा बिजुलीबसको उद्घाटन हुने सुन्दर यातायातले जनाएको छ ।
अघिल्लो हप्ता सुन्दर यातायातले काठमाडौको भत्केको पुलमा चार्जिङ स्टेशन सञ्चालनमा ल्याएको थियो । चार्जिङ स्टेशन सञ्चालनमा आएसँगै काठमाडौको सडकमा पहिलो पटक निजी क्षेत्रको बिजुली बस गुड्ने भएको हो ।
बस ४० सिटे र ३५ सिटे गरी दुई प्रकारको रहेको सुन्दर यातायातले जनाएको छ । ४० सिटे बसमा अरु ३० जना यात्रुले र ३५ सिटे बसमा अरु २५ जना यात्रुले उभिएर आरामका साथ यात्रा गर्न सक्ने सुन्दर यातायात सञ्चालक समितिका सदस्य सुरेश पोखरेलले बताए ।
अरु बसको तुलनामा यो बसमा सिटको व्यवस्थापन फरक तरिकाले गरिएको छ । बसमा अगाडि मात्र बस्न र उभिन खोज्ने यात्रुलाई ध्यानदिंदै पछाडिको सिट आकर्षक बनाइएको कम्पनीको भनाइ छ ।
कम्पनीका अनुसार पछाडिको सिट सिनेमा हलको बाल्कोनी जस्तै हुनेछ ।यसले गर्दा सिटमा बस्न खोज्नेहरु पछाडि जाने र गाडीभित्रको चापलाई व्यवस्थित गर्न सकिने कम्पनीले जनाएको छ । यस्तै वसमा सीसी क्यामेराको प्रयोग, जीपीएस ट्रयाकिङ, एयरकण्डिसनको सुविधाले अझ यात्रुमैत्री बनाउने सुन्दर यातायातले जनाएको छ ।
त्यस्तै उभिएकायात्रुलाई सहजरुपमा समात्नको लागि प्रयोग गरिएको ह्याङ्गर नरम र लचकदार हुँदा जुनसुकै उमेरका र उचाइका यात्रुलाई यात्रागर्दा थप सहज हुने कम्पनीको दाबी छ । बसमा फोहोर व्यवस्थापनकालागि डस्टबिन राखिएको छ ।
यस्तै भाडाका लागि कार्ड र ई–पेमेन्ट गर्नसकिनेछ । भत्केको पुलमा सञ्चालनमा आएको चार्जिङ स्टेशनमा एकै पटक ६ ओटा बस चार्ज गर्न सकिने कम्पनीले जनाएको छ । चार्जिङ स्टेशनमा कम्तीमा चार घण्टामा गाडी पुरै चार्ज हुनेछ ।
यस्ता छन् बस चल्ने रुट
बिजुली बस रिङरोड, नारायणस्थान हुँदै चक्रपथ, भैंसेपाटी, गोंगबु बसपार्क हुँदै सल्लाघारी भक्तपुर, कलंकी ढुंगेअड्डाहुँदै नेपाल मेडिकल कलेजसम्म सञ्चालनमा ल्याइने छ ।
सुन्दर यातायातका विद्युतीय बस पहिलो चरणमा काठमाण्डौका ५ रुटमा गुड्ने छन् । पहिलो रुटमा बसहरुले चक्रपथ परिक्रमा गर्नेछन् । दोस्रो रुटमा नारायणथान, जावलाखेल–मेडिसिटी अस्पताल पुग्नेछन् ।
साथै तेस्रो रुटमा गोगंवु–सामाखुसी–गौशला–कोटेश्वर हुँदै सल्लाघारीसम्म पुग्नेछन् । चौथो रुट अन्तर्गत ढुंगेअड्डा–कलंकी–त्रीपुरेश्वर–वीर अस्पताल–जमल–कृष्णपाउरोटी–रातोपुल–गौशला–चावहिल–बौद्ध–जोरपाटीस्थित अत्तरखेलसम्म पुग्नेछन् ।
त्यसैगरी अन्तिम रुट सूर्य्विनायक–कोटेश्वर–बानेश्वर–वीरअस्पताल र जमल रहेको छ ।
