९ असोज,विराटनगर ।
विराटनगरका उराँव समुदायले आफ्नो सबैभन्दा ठूलो पर्व कर्माधर्मा सम्पन्न गरेका छन् । विराटनगर–४ सखुवारे टोलका उराँव समुदायले विहीबार साङे गर्दै यो पर्व सम्पन्न गरेका छन् । समुदायका मानिसहरु एकत्रित भइ पजापाठ,नाचगान,भोजभतेर र एकअर्कामा खुशियाली साटासाटगर्दै कर्माधर्मा सम्पन्न गरेका छन् ।
यो पर्वमा जमरा राखेपछि सात दिनसम्म प्रत्येक बेलुका एकएक घन्टा जातिय नृत्य गर्दै मनोरञ्जन गर्ने गरिन्छ । जमरा राखिएको एक साता पछि जंगलबाट करम रुखको हाँगा ल्याएर पारम्परिक विधिविधान अनुसार पुजापाठ गरिन्छ । गाँउ टोलको चोकमा पुजास्थलको निर्माण गरेर करमको हाँगालाई मिठाई र जाँड चढाएर पुजापाठ गरिन्छ ।
यो पुजामा करमको हाँगा नजिक धान,गहुँ र मकै लगायतका आफ्नै खेतमा उब्जिएका खाद्यान्न राखेर पुजा गरिन्छ र त्यो समुदायका सबै घरहरुमा प्रसादको रुपमा वितरण गर्ने प्रचलन रहेको स्थानिय सत्यनारायण उराँवले जानकारी दिए । २ दिनसम्म साङे गर्दै अन्तिम दिन भोजभतेर र नाचगान गर्दै यो पर्व समापन गरिन्छ । यो पर्वमा बालबालिकालाई नयाँ लुगा किनिदिने तथा अल्लोपल्लो गाँउका नातेदारलाई आमन्त्रण समेत गरिन्छ ।
यो पर्व मनाए रोगब्याधि नलाग्ने र खेतमा राम्रो उब्जनी हुने विश्वास गरिन्छ । अषाढदेखी कात्तिक महिनाभित्र आफ्नो अनुकुलता अनुसार यो पर्व मनाउने चलन रहेको स्थानिय कविता उराँवले बताइन् ।
