१६ असोज, काठमाडौँ ।
नेकपाका नेता कृष्णबहादुर महराको यौन दुब्र्यवहार काण्डबारे समाजवादी पार्टी नेपालका अध्यक्ष डा. बाबुराम भट्टराईले सामाजिक संजालमा कडा प्रतिक्रिया दिएका छन् ।
डा. भट्टराईले पूर्वसहयोद्दा महराविरुद्ध सामाजिक संजाल ट्वीटरमा ट्वीट गर्दै सत्ताशक्तिको धाकमा एउटा पुरूषले परस्त्रीगमन गर्ने ! भेद खुलेपछि ती स्त्रीलाई नै फकाएर,धम्काएर युटर्न गराउने र आफ्नो टाउको बचाउने ! परपुरूषगमन गरेबापत अर्को पुरूष लोग्नेले घरनिकाला गर्ने ! यो रामरावण द्वन्दमा सीतालाई बली चढाउने चलन कहिलेसम्म ? यही हो महिलामुक्ति,सांस्कृतिक क्रान्ति, कणहरू ? भनेर लेखेका छन्।
अघिल्लो दिन महराले यौन दुब्र्यवहार गरेको आरोप लगाएकी रोशनी शाहीले २४ घन्टा नबित्दै बयान फेरेकी थिइन् । त्यही प्रशंगलाई लिएर डा. भट्टराईले सत्ताशक्तिको आडमा धम्क्याएर फकाएर कुरा फेर्न लगाएर युटर्न गराउने र आफ्नो टाउको बचाउने महरा प्रवृत्तिमाथि प्रहार गरेका हुन् ।बिहीबार बिहान रोशनी शाहीका श्रीमान् चित्रजंग शाहीले आफूहरुबीच सम्बन्ध टाढिएको र अलग अलग बस्ने निर्णय गरेको कुरा सामाजिक संजालमार्फत सार्वजनिक गरेका छन् ।
