१७ असोज, विराटनगर । नेपाली कांग्रेसका उपसभापति बिजयकुमार गच्छदारले सरकारले प्रजातान्त्रिक, लोकतान्त्रिक पद्धतिलाई कमजोर गर्नेगरि क्रियाकलाप अगाडि बढाइरहेको आरोप लगाएका छन् ।
विराटनगर विमानस्थलमा शुक्रबार बिहान सञ्चारकर्मीसंग कुराकानी गदै उनले जनताको म्याण्डेट पाएर दुइतिहाईको बहुमतको सरकार गठन भएपनि जनताको अपेक्षा अनुसार काम गर्न नसकेको विचार ब्यक्त गरे । उनले नेपाली जनता र मुलुकको उत्थानको ऐतिहासिक अवसर पाएपनि सरकारले त्यसअनुसार काम गर्न नसकेको बताउदै निर्वाचनताका जनता माझ बांडिएको सपना खोक्रो साबित भएको बताए ।
सरकारले शान्तिसुरक्षा कायम गर्न नसकेको र प्रेस स्वतन्त्रतालाई संकुचित गर्ने लगायतका गैर प्रजातान्त्रिक गतिविधिमा सरकार अघि बढेको उनको भनाई थियो ।
मुलुकको विकासलाई प्राथमिकता दिनुपर्ने भएपनि दलगतरुपमा देशलाई कम्युनिष्ट राज्यमा परिणत गर्ने नियतले सरकारले काम गरिरहेको आरोप उनले लगाए ।
उपसभापति गच्छदारले हालै आफ्नो पार्टीको एकजना जिल्ला सभापति माथि सांघातिक कुटपिट भएको र पार्टीका नेता डाक्टर मिनेन्द्र्र रिजालमाथि हातपात र दुब्र्यवहारको प्रयास भएको बताउदै त्यसप्रकारको गतिविधिले संबिधानप्रदत अधिकार कुण्ठित भएको बताए ।
उनले प्रधानमन्त्री ओलीसहित सत्तापक्षका नेताहरुसंग केहिदिन अघि नेपाली कांग्रेसका शिर्ष नेताहरुसंग भएको छलफलमा प्रतिपक्षसंग सहकार्य गरेर मुलुक विकासमा अघि बढ्ने प्रतिबद्धता आएपनि सरकारले त्यसविपरीतको गतिविधि गरिहेको दाबी गरे ।
सरकार अझैपनि आफ्ना कृयालाप सच्याएर जनताको अभिमत अनुसार देशबिकासमा लाग्नुपर्ने उनको सुझाव थियो ।
