१८ असोज, एजेन्सी ।
वेष्ट इन्डिजमा जारी क्यारेबियन प्रिमियर लिग (सीपीएल) अन्तर्गत लिग चरणको अन्तिम खेलमा ट्रिनबागो नाइट राइडर्सविरुद्ध गुयाना अमेजन वारियर्स ७ विकेटले विजयी भएको छ ।
नाइट राइडर्सले दिएको १४४ रनको लक्ष्य गुयानाले १८.४ ओभरमा ३ विकेट गुमाएर पूरा गर्यो । उसका लागि निकालेश पूरनले ५४, ब्रान्डन किंग्सले ३३, कप्तान सोयब मलिकले नटआउट २८ रन बनाए ।
बलिङमा नाइट राइडर्सका जिमी नीशम, अलि खान र खरी पिर्रेले एक–एक विकेट लिए । यसअघि टस हारेर ब्याटिङको मौका पाएको किरण पोलार्ड नेतृत्वको नाइट राइडर्सले निर्धारित २० ओभरमा ५ विकेट गुमाएर १४३ रन बनायो ।
उसका लागि कोलिन मुनरोले सर्बाधिक ४०, किरण पोलार्डले नटआउट ३६, लेन्डल सिमोन्सले ३० र जिमी नीशमले अविजित १२ रनको योगदान दिए । बलिङमा गुयानाका लागि चन्द्रपोल हेमराजले ३, बेन लाफलिन र कप्तान सोयब मलिकले १–१ विकेट लिए ।
आजको खेलसँगै प्लेअफ पुग्ने टिमको टुंगो लागेको छ । यो सिजनमा गुयाना अमजेन वारियर्स १० खेलमा १० मै जीत हासिल गर्दै २० अंक जोडेर शीर्ष स्थानमा रहेको रह्यो ।
यस्तै प्लेफमा पुग्न सफल अर्को टिम नेपाली लेग स्पिनर सन्दीप लामिछानेआवद्ध बार्बाडोस ट्राइडर्स हो । उसले १० मा पाँचमा हार र ५ खेलमा जीत निकाल्यो । तालिकामा १० अंक जोड्दै दोस्रो स्थानमा रह्यो । यो टिममा जसन होल्डर कप्तान छन् ।
