एजेन्सी, असोज २५
युरो छनोटमा सुपरस्टार फरवार्ड क्रिस्टियानो रोनाल्डोले गोल गरेपछि पोर्चुगलले प्रभावशाली जित निकालेको छ । शुक्रबार राति भएको खेलमा घरेलु टोली पोर्चुगलले लक्जेमवर्गमाथि ३–० को प्रभावशाली जित निकालेको हो ।
घरेलु टोलीका लागि रोनाल्डोसँगै बर्नाडो सिल्भा र गोन्काले गुइडेजले पनि गोल थपे । खेलको १६ औं मिनेटमा बर्नाडो सिल्भाको गोलबाट पोर्चुगल पहिलो हाफमा १–० ले अघि बढेको थियो ।
त्यसअघि खेलको शुरुवातदेखि पोर्चुगलले लक्जेमवर्गमाथि लगातार पोस्ट आक्रमण बुनेको थियो । तेस्रो मिनेटमा रोनाल्डो, १३औं मिनेटमा जाओ फेलिक्स र १५औं मिनेटमा फेलिक्स नै गोलबाट चुकेको थियो । २४औं मिनेटमा रोनाल्डोको शक्तिशाली प्रहार गोलरक्षक एन्थोनी मोरिसले बचाए । ३६औं मिनेटमा पोर्चुगलका गोलरक्षक रुइ प्याट्रिसियोलेले सम्भावित बराबरी टारे ।
लगातार लक्जेमवर्गलाई दवावमा राखेको पोर्चुगलका लागि ६५औं मिनेटमा कप्तान रोनाल्डोले चिप गोल गर्दै अग्रता दोब्बर पारे । रोनाल्डोको यो ९४ औं अन्तर्राष्ट्रिय गोल हो भने समग्रमा ६९९औं गोल हो । खेल सकिन १ मिनेट बाँकी रहँदा गोन्काले गुइडेजले गोल गर्दै पोर्चुगलको ३–० को जित सुनिश्चित गरे ।
जितसँगै पोर्चुगलले समूह ‘बी’ बाट युरोकपमा छनोट हुने सम्भावना बलियो बनाएको छ । पोर्चुगल ५ खेलबाट ११ अंक जोडेर दोस्रो स्थानमा रहेको छ । एक खेल बढी खेलेको युक्रेन ६ खेलबाट १६ अंक जोडेर शीर्षस्थानमा रहेको छ । सर्विया ७ अंक जोडेर तेस्रो, लक्जेमवर्ग ४ अंकसहित चौथो तथा लिथुनिया १ अंक जोडेर पुछारमा छ । समूहको अर्को खेलमा युक्रेनले लिथुनियालाई २–० ले पराजित गरेको छ ।
