२५ असोज, काठमाडौं ।
चिनियाँ राष्ट्रपति सी चिनफिङ दुई दिने राजकीय भ्रमणका क्रममा आज अपरान्ह साढे तीन बजे त्रिभुवन अन्तर्राष्ट्रिय विमानस्थलमा उनी उत्रिने छन्।
नेपाली सेनाले सी आउनु अघि साढे ११ बजेबाट हवाईगस्ती सुरु गरेको छ। अत्याधुनिक दूरविनबाट निगरानी गर्दै सेनाले हवाई गस्ती सुरु गरेको हो। सेनाकै नेतृत्वमा चार वटा सुरक्षा निकायले सीको भ्रमण अवधिभरलाई पहरेदार दिइरहेका छन्।
सेनाले हवाईसँगै पैदल गस्तीलाई निरन्तरता दिएको छ। सेनासँगै प्रहरी, सशस्त्र प्रहरी र राष्ट्रिय अनुसन्धान विभागका सुरक्षाकर्मीले पैदलगस्ती गरिरहेका छन्।
सीको भ्रमणमा प्रयोग हुने सवारी रुटमा पर्ने ठूला घरका छतबाट समेत सेनाले अत्याधुनिक हतियार र दूरविनबाट निगरानी गरिरहेको छ। सेना, प्रहरी र सशस्त्रले कन्ट्रोल रुम भेइकल (सीआरभी) मार्फत सवारी रुटमा गस्ती गरिरहेका छन्।
नेपाल प्रहरीका प्रवक्ता डीआइजी विश्वराज पोखरेलले सुरक्षाको सम्पूर्ण प्रबन्ध भइसकेको र त्रुटिरहित ढंगले सीको भ्रमणलाई सफल बनाउने बताए।
सीको जहाज काठमाडौं उत्रेपछि उनको सडक सवारी हुँदा नेपाली सेनाको हेलिकप्टरले एरियल रेकी गर्नेछ।
